CƏMİYYƏT
Gürcüstanda daha bir qadın qripdən dünyasını dəyişib
Tbilisi, 23 yanvar, AZƏRTAC
Gürcüstanda gənc qadın qripdən dünyasını dəyişib.
AZƏRTAC xəbər verir ki, hadisə ölkənin Zuqdidi şəhərində qeydə alınıb.
Abxaziyadan məcburi köçkün, 22 yaşlı pasiyent yanvarın 19-da xəstəxanaya yerləşdirilib. Vəziyyəti ağırlaşan xəstə Kutaisi xəstəxanasına çatdırılıb. Lakin burada da həkimlər xəstəni müalicə edə bilməyiblər. Gənc qadın ötən gün Tbilisi xəstəxanasına aparılarkən yolda dünyasını dəyişib.
Qeyd edək ki, yanvarın 8-də Gürcüstanın Çiatura rayonunda 30 yaşlı qadın da qripdən ölüb.
Hazırda ölkədə əhalinin hər 100 min nəfərindən 26-sında qripə yoluxma halı qeydə alınıb. Mütəxəssislər qripin epidemiya halı almadığını bildirsələr də əhalini son dərəcə ehtiyatlı olmağa çağırıblar.
Xətayi Əzizov
AZƏRTAC-ın xüsusi müxbiri
Tbilisi