İQTİSADİYYAT
GÜRCÜSTANDA NƏŞR EDİLƏN JURNALIN KEÇİRDİYİ MÜSABİQƏDƏ ARDNŞ QALİB GƏLMİŞDİR
AZƏRTAC-ın xüsusi müxbiri xəbər verir ki, Tbilisidə çıxan “Saxelebi” (Şəxsiyyətlər) jurnalının investorlar arasında keçirdiyi müsabiqədə Azərbaycan Respublikasının Dövlət Neft Şirkəti (ARDNŞ) qalib gəlmişdir.
Gürcüstan parlamentinin vitse-spikeri Qiqi Sereteli noyabrın 10-da bu münasibətlə keçirilən tədbirdə çıxış edərək jurnalın uğurlu fəaliyyətini vurğulamışdır. Jurnal öz nömrələrində ulu öndər Heydər Əliyevin, Azərbaycan Respublikasının Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın Qafqazda sabitlik və iqtisadi inkişaf yolunda əvəzsiz xidmətlərinə dair yazılara geniş yer verir.
İlin ən yaxşı sərmayəçisi kimi ARDNŞ-in Gürcüstan nümayəndəliyinin rəhbəri Mahir Məmmədov da qiymətli hədiyyəyə layiq görülmüşdür. Jurnal ingilis və gürcü dillərində nəşr olunur.