Yaponiya Rusiyanın 9 şirkətinə sanksiya tətbiq edəcək
Pekin, 24 may, AZƏRTAC
Yaponiya Şimali Koreyadan silah tədarükündə iştirakına görə Rusiyanın 9 şirkətinə və bir fərdi şəxsinə sanksiya tətbiq edəcəyini açıqlayıb.
AZƏRTAC xəbər verir ki, bu barədə Yaponiya Nazirlər Kabinetinin Baş katibi Yoşimasa Hayasi açıqlama verib.
Baş katib BMT Təhlükəsizlik Şurasının müvafiq qətnamələrinə zidd olaraq Rusiyanın Şimali Koreyadan silah transfer etməsini sərt şəkildə qınadığını deyib.
“Rusiyanın Ukraynaya müdaxiləsi davam etdiyi üçün beynəlxalq ictimaiyyətlə əlaqələndirmə son dərəcə vacibdir”, - deyə Yoşimasa Hayasi bildirib.
Yaponiya Xarici İşlər Nazirliyinin açıqlamasına görə, sanksiya tətbiq edilən şirkətlərin və fərdin Yaponiyadakı bütün əmlakları dondurulacaq. Rəsmi Tokio Kiprin 2 şirkətinə də eyni səbəbə görə sanksiya tətbiq edilməsi barədə qərar qəbul edib.
Qeyd edək ki, Rusiya-Ukrayna müharibəsi başlayandan bəri Yaponiya “Böyük yeddilər” (G7) qrupu ilə koordinasiyalı şəkildə Prezident Vladimir Putin də daxil olmaqla Rusiyanın dövlət rəsmilərinə və qurumlarına qarşı sanksiya tətbiqinə başlayıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
