ELM VƏ TƏHSİL
Bakı Türk Anadolu Liseyinin müəllim və şagird heyəti Ankaraya səfər edib
Ankara, 24 may, AZƏRTAC
Bakı Türk Anadolu Liseyinin müəllim və şagird heyəti “Qardaşlaşmış məktəblər” proqramı çərçivəsində Ankaraya səfər edib. AZƏRTAC xəbər verir ki, nümayəndə heyəti Azərbaycanın Türkiyədəki səfirliyində olub.
Şagirdlərin qarşısında çıxış edən Azərbaycan Mədəniyyət Mərkəzinin direktoru Samir Abbasov qeyd edib ki, dövlətimiz və şəxsən Prezident İlham Əliyev gənc nəslin formalaşmasına və inkişafına xüsusi diqqət yetirir, gənclərin potensialına ürəkdən inanır. O əlavə edib: “Bu gün gənclərin üzərinə böyük məsuliyyət düşür, onlar Türkiyə-Azərbaycan qardaş əlaqələrini daha da möhkəmləndirməlidirlər”.
Samir Abbasov müəllim və tələbələrə qardaş ölkədə həm təhsil, həm də mədəniyyət sahəsində həyata keçirilməsi planlaşdırılan layihələr barədə məlumat verib. “Təhsil sahəsində əlaqələr ölkələrimiz arasında mədəni körpülərin qurulmasına kömək edir”, - deyə o bildirib.
Bakı Türk Anadolu Liseyinin direktoru Abdullah Yıldırım qonaqpərvərliyə görə diplomatik missiyanın əməkdaşlarına minnətdarlığını bildirib və qeyd edib ki, budəfəki səfər onun rəhbərlik etdiyi təhsil müəssisəsi ilə Ankaradakı M.Ə.Rəsulzadə adına lisey arasında əməkdaşlıq müqaviləsi çərçivəsində həyata keçirilir. O vurğulayıb: “Belə səfərlər gəncləri ölkələrimizin reallıqları, tarixi, mədəniyyəti və adət-ənənələri ilə daha yaxından tanış etməyə imkan verir. Bu, yeni dostluq körpülərinin qurulması üçün çox vacibdir”.
Ramin Abdullayev
AZƏRTAC-ın xüsusi müxbiri
Ankara