İQTİSADİYYAT
Bu il dövlət qeydiyyatına alınan mülkiyyət hüququnun 75 faizi bölgələrin payına düşüb
![Bu il dövlət qeydiyyatına alınan mülkiyyət hüququnun 75 faizi bölgələrin payına düşüb](/files/2024/2/1200x630/1716546544363173246_1200x630.jpg)
Bakı, 24 may, AZƏRTAC
İqtisadiyyat Nazirliyi yanında Əmlak Məsələləri Dövlət Xidməti tərəfindən cari ilin yanvar-aprel ayları ərzində daşınmaz əmlak üzərində 121 min 61 mülkiyyət hüququ qeydiyyata alınaraq çıxarışla təmin edilib.
Əmlak Məsələləri Dövlət Xidmətindən AZƏRTAC-a bildirilib ki, bu göstəricinin 18 min 440-ı (15,2 faiz) ilkin, 102 min 621-i isə (84,8 faiz) isə təkrar qeydiyyatın payına düşür.
Bu ilin ilk 4 ayında fərdi yaşayış və bağ evi üzərində - 17 min 896, mənzil üzərində - 26 min 445, torpaq sahəsi – 72 min 951, qeyri-yaşayış binası – 1047, qeyri-yaşayış sahəsi – 2470, əmlak kompleksi - 240, çoxmərtəbəli yaşayış binası üzərində isə 12 mülkiyyət hüququnun dövlət qeydiyyatı aparılıb. Bu dövrdə qeydiyyata alınan mülkiyyət hüquqlarının 29 min 798-i Bakının, qalan hissəsi isə bölgələrin payına düşür.
Bu ilin yanvar-aprel ayları ərzində 90 min 43 texniki pasport tərtib edilib, 22 min 387 ipoteka müqaviləsi qeydiyyata alınıb.