CƏMİYYƏT
Azərbaycanda dövriyyəsi məhdudlaşdırılan narkotik vasitələrin siyahısında dəyişiklik olunub
![Azərbaycanda dövriyyəsi məhdudlaşdırılan narkotik vasitələrin siyahısında dəyişiklik olunub](/files/2024/2/1200x630/17165428742648327335_1200x630.jpg)
Bakı, 24 may, AZƏRTAC
Azərbaycanda dövriyyəsi məhdudlaşdırılan narkotik vasitələrin siyahısında dəyişiklik edilib.
AZƏRTAC xəbər verir ki, bu "Azərbaycan Respublikasının ərazisində dövriyyəsi qadağan edilmiş, məhdudlaşdırılmış və nəzarət edilən narkotik vasitələrin, psixotrop maddələrin, habelə Azərbaycan Respublikasının ərazisində idxalına, ixracına, tranzit nəql edilməsinə və istehsalına lisenziya (xüsusi razılıq) tələb olunan prekursorların siyahılarında" dəyişikliklə bağlı qanun layihəsində öz əksini tapıb.
Dəyişikliyə əsasən, "Azərbaycan Respublikasının ərazisində dövriyyəsi məhdudlaşdırılan narkotik vasitələr və psixotrop maddələr" fəslindən "Dihidrokodein" və "Properidin" çıxarılıb. Bundan başqa, "Azərbaycan Respublikasının ərazisində dövriyyəsinə nəzarət edilən psixotrop maddələr" fəslinə "Dekstrometorfan" (başqa mürəkkəb tərkibli dərman preparatlarının tərkibində nəzarətdə saxlanılmır) əlavə olunur.
Qanun layihəsi müzakirələrdən sonra səsverməyə qoyularaq üçüncü oxunuşda təsdiqlənib.