DÜNYA
Viktor Orban: Macarıstan NATO-da öz rolunu yenidən qiymətləndirir
![Viktor Orban: Macarıstan NATO-da öz rolunu yenidən qiymətləndirir](/files/2024/2/1200x630/17165573143006944878_1200x630.jpg)
Budapeşt, 24 may, AZƏRTAC
Macarıstan hökuməti Alyansın Ukraynadakı hərbi missiyasında iştirak etmək istəmədiyi üçün ölkənin NATO-dakı rolunu yenidən qiymətləndirir.
AZƏRTAC xəbər verir ki, bu sözləri Macarıstanın Baş naziri Viktor Orban “Kossuth” radiostansiyasının səhər proqramında çıxışı zamanı deyib.
Orban təsdiq edib ki, Macarıstan NATO-nun blok ölkələrini birbaşa Ukrayna münaqişəsinə cəlb edəcək və Rusiya ilə birbaşa toqquşmaya səbəb ola biləcək hərəkətlərində iştirak etmək niyyətində deyil. Onun sözlərinə görə, Brüsseldə hərbi planlaşdırma aparılır, işçi qruplar NATO-nun bu müharibədə necə iştirak edə biləcəyi üzərində işləyir.
“Macarıstan buna qarşıdır. Müharibədə iştirak etmədən NATO üzvü olaraq necə qala biləcəyimizi müəyyən etmək üçün hökumətdə kifayət qədər ciddi iş gedir”, - deyə Orban bildirib. O əlavə edib ki, Brüssel bundan xəbərdardır və hətta Macarıstan üçün yeni bir termin irəli sürüb - “iştirakçı olmayan dövlət”.
Vüqar Seyidov
AZƏRTAC-ın xüsusi müxbiri
Budapeşt