GÜRCÜSTANIN ALİ MƏKTƏBLƏRİNDƏ HƏRBİ KAFEDRALAR LƏĞV OLUNACAQ, HƏRBİ XİDMƏT MÜDDƏTİ BİR İLƏ ENDİRİLƏCƏKDİR

01.10.2004 [11:07]
Çap et
A⁺ A^-

AZƏRTAC-ın xüsusi müxbiri xəbər verir ki, Gürcüstan parlamenti müdafiə və təhlükəsizlik komitəsinin on nəfər üzvü Müdafiə Nazirliyinin Xaşuri rayonu ərazisində bir aylıq hərbi təlim keçməyə başlamışdır. Bu müddət ərzində komitənin yığıncaqlarının həmin düşərgədə keçirilməsi qərara alınmış və indiyədək burada 8 məsələ müzakirə olunmuşdur.

Komitə sədrinin müavini David Kirkitadzenin sözlərinə görə, “İcbari hərbi xidmət haqqında” qanun layihəsinin burada müzakirəsi yerinə düşmüşdür. Layihədə icbari hərbi xidmətin müddətinin bütün çağırışçılar üçün bir ilə endirilməsi nəzərdə tutulur. Qanun layihəsi komitə üzvləri tərəfindən bəyənilib parlamentin müzakirəsinə təqdim edilmişdir.

Komitənin yığıncağında, həmçinin ali məktəblərdə hərbi kafedraların ləğv edilməsinə dair qərar qəbul olunmuşdur.