“Harmsco Europe” şirkətinin nümayəndələri “Ekol Mühəndislik Xidmətləri” QSC-də olmuşlar
Bakı, 4 aprel (AZƏRTAC). Aprelin 4-də Azərbaycan Respublikası Dövlət Neft Şirkətinin (ARDNŞ) “Ekol Mühəndislik Xidmətləri” Qapalı Səhmdar Cəmiyyətində (QSC) çirkab suların filtrasiyası və neftlə çirklənmiş torpaqların təmizlənməsi sahəsində fəaliyyət göstərən ABŞ-nın “Harmsco Europe” şirkətinin nümayəndələri ilə görüş keçirilmişdir.
QSC-dən AZƏRTAC-a bildirmişlər ki, görüşdə müəssisənin baş direktorunun müavini Məzahir Hüseynov qurum haqqında qonaqlara ətraflı məlumat vermişdir.
“Harmsco Europe” şirkətinin nümayəndəsi Andrea Melo bildirmişdir ki, təmsil etdiyi qurum çirkab suların təmizlənməsində istifadə olunan müxtəlif filtrlər istehsal edir və bu sahədə layihələr həyata keçirir, eyni zamanda, çirklənmiş torpaqların təmizlənməsi sahəsində fəaliyyət göstərir.
Görüşdə gələcəkdə ikitərəfli əməkdaşlıq əlaqələrinin yaranması üçün qarşılıqlı araşdırmaların aparılması qərara alınmışdır.
Sonra mövzu ətrafında fikir mübadiləsi aparılmış, növbəti görüşlərdə texniki mütəxəssislər cəlb olunmaqla sənaye axarlarına baxış keçirilməsi və əməkdaşlığın mümkün variantları müəyyən edilməsi müzakirə olunmuşdur.
Bölmənin digər xəbərləri
