HƏMKARLAR İTTİFAQLARI KONFEDERASİYASININ MƏLUMATI
AHİK-in sədri, Millət vəkili Səttar Mehbalıyev Yaponiyanın Beynəlxalq Əməkdaşlıq Bankının Moskvadakı nümayəndələri Siroake Siqa və Yuko Xiroto ilə görüşmüşdür.
Qonaqları səmimi salamlayan Səttar Mehbalıyev Azərbaycanın həmkarlar ittifaqları haqqında məlumat verərək, respublikanın iqtisadiyyatından, özəlləşdirmədən, kənd təsərrüfatı ilə bağlı problemlərdən danışmışdır. Ermənistan-Azərbaycan, Dağlıq Qarabağ münaqişəsi nəticəsində Ermənistan silahlı qüvvələri tərəfindən torpaqlarımızın 20 faizinin işğalı ilə əlaqədar minlərlə iş yerinin itirilməsindən, qaçqınlar ordusunun yaranmasından bəhs edən AHİK-in sədri bu problemlərin aradan qaldırılması üçün respublikada görülən tədbirlərdən, işçilərin sosial vəziyyətindən, yoxsulluqla mübarizədən söhbət açmışdır.
Qonaqların nəzərinə çatdırılmışdır ki, Azərbaycan Respublikası keçid dövründə yaşamasına və müharibə vəziyyətində olmasına baxmayaraq, işçilərin sosial vəziyyətinin yaxşılaşdırılması daim diqqət mərkəzində saxlanılır. Son iki ildə bəzi kateqoriyalı işçilərin əmək haqlarının artırılması, digər kateqoriyadan olanlara bir sıra güzəştlərin verilməsi məhz onların sosial vəziyyətlərinin yaxşılaşdırılması istiqamətində atılan addımlardır.
Yaponiyanın Beynəlxalq Əməkdaşlıq Bankının Moskvadakı nümayəndəsi Siroake Siqa səmimi görüş üçün təşəkkürünü bildirmiş, respublikada yoxsulluğun aradan qaldırılması, ölkəmizin vətəndaşlarının maddi rifah halının yaxşılaşdırılması üçün göstərəcəkləri maddi və mənəvi yardımdan söz açaraq, bu sahədə Azərbaycan Həmkarlar İttifaqları ilə birgə əməkdaşlıq etməkdə maraqlı olduqlarını bildirmişdir.
Bölmənin digər xəbərləri
