Bakı, 19 sentyabr, AZƏRTAС

Uzun müddətdir ki, Azərbaycan dövləti Qarabağ iqtisadi zonasında Ermənistanın qeyri-qanuni silahlı birləşmələri, eləcə də bu ölkənin silahlı birləşmələrinin silahlanması ilə bağlı dünya mətbuatını və beynəlxalq təşkilatları məlumatlandırır. Bu gün xidməti tapşırığı icra edən Daxili Qoşunlarımızın şəxsi heyətinin ermənilər tərəfindən quraşdırılmış minanın partlaması nəticəsində şəhid olması, eləcə də Xocavənd-Şuşa istiqamətində təminat işləri ilə məşğul olan mülki vətəndaşlarımızın şəhid olması Azərbaycanın haqlı olduğunu bir daha göstərdi və Azərbaycan Ordusu tərəfindən lokal hərbi tədbirlərin həyata keçirilməsinə məcbur edildi.

Bunu “Həmvətənlərə Dəstək” İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn AZƏRTAC-a açıqlamasında söyləyib.

“Biz dəfələrlə bəyan etmişik ki, Ermənistan üçtərəfli Bəyanatda atdığı imzaya hörmət etmir, bu sənədin bəndlərini yerinə yetirmir. Demək ki, Ermənistanın siyasəti ikiüzlü siyasətdir və razılaşmaya aparan siyasət deyil. Bundan əlavə, Azərbaycan dövlətinin vətəndaşların təhlükəsiz qaydada köçürülməsinə mane olmaq, vətəndaşlarımızın öz dədə-baba yurdlarına köçməsinin qarşısını almaq məqsədi daşıyır. Azərbaycan 44 günlük Vətən müharibəsi dövründə BMT-nin qəbul etdiyi dörd qətnaməni özü icra etdi. Həmin qətnamələrin birinci hissəsində torpaqların işğaldan azad olunması tələb edilirdi. Əfsuslar olsun ki, bu tələbin icrasına BMT tərəfindən nəzarət edilmədi, əksinə sənədin icrasının dondurulması müşahidə olundu.

Həmin qətnamənin ikinci hissəsinə istinad edərək Azərbaycan məcburi köçkünlərimizin geri qayıdışını bu gün həyata keçirir. Bu geri qayıdışın qarşısını almaq üçün bölgədə terror hadisələri törədilir. Gənclər, uşaqlar, körpələr yaşayan istiqamətlərdə mina sahələri qurulur. Bəs barışıq əldə olunduğu təqdirdə mina terroru, məktəblərin, bağçaların qarşısında törədiləcək? Bu sualın cavabı olaraq Azərbaycan mütləq şəkildə silah-sursat anbarlarını, Ermənistana məxsus olan hərbi birləşmələri ləğv etməlidir və Qarabağ iqtisadi zonası tamamilə silahsızlaşdırılmalıdır”, - deyə E.Hüseyn bildirib.

Ekspert deyib ki, Azərbaycan Respublikasının Silahlı Qüvvələri tərəfindən Qarabağ bölgəsində keçirilən lokal xarakterli antiterror tədbirləri

çərçivəsində yalnız legitim hərbi obyektlər və hərbi infrastruktur dəqiq silahlarla hədəfə alınır və sıradan çıxarılır. Bu o deməkdir ki, artıq əlində silah olan separatçılar zərərsizləşdiriləcək.