Het hökmdarının bazaltdan düzəldilmiş heykəli tapılmışdır
Bakı, 8 avqust (AZƏRTAC). Kanadanın Toronto Universitetinin professoru Timoti Harrisonun rəhbərlik etdiyi beynəlxalq arxeoloji ekspedisiya Türkiyənin şərqində yerləşən Hatay əyalətində Het hökmdarının heykəlini aşkarlamışdır.
3 min il yaşı olan bazaltdan düzəldilmiş heykəlin hündürlüyü 1,5 metrdir. Yaxşı vəziyyətdə qalmış heykəlin Kiçik Asiyanın qüdrətli imperiyasının hökmdarı olmuş Sappilulimanın təsviri olduğu güman edilir. Sappiluliman indiki Türkiyə və Suriya daxil olan geniş ərazidə hakimiyyətini gücləndirə bilmişdir.
Het hökmdarı bir əlində sünbül, digərində isə nizə tutmuşdur. Bu iki rəmz istilaçının həm cəngavərliyini, döyüşkənliyini, həm də onun təbəələrinin sülhsevər əməyinin göstəricisi hesab olunur.
Bacarıqlı heykəltəraşın yonduğu heykəldə hökmdarın qıvrım saçları və qara bazaltdan hazırlanmış və ağ fonda geniş açılmış göz bəbəkləri diqqəti cəlb edir.
Nadir nümunə bir il müddətində tədqiq ediləcək və Hatay şəhərindəki muzeydə nümayiş etdiriləcəkdir.
Bölmənin digər xəbərləri
