Honkonq polisi qanunsuz aksiyaya görə 53 nəfəri həbs edib
Pekin, 10 iyun, AZƏRTAC
Çinin Honkonq xüsusi inzibati bölgəsində polis qanunsuz toplaşmaqda şübhəli bilinən 53 nəfəri həbs edib.
AZƏRTAC Çin KİV-lərinə istinadla xəbər verir ki, polisin yaydığı məlumatda qanunsuz aksiya iştirakçılarının şəhərin mərkəzi hissəsində yolları bir neçə dəfə bağladıqları və özlərini nizamsız apardıqları qeyd olunub. Qanunsuz aksiyanın dayandırılması üçün əməliyyat keçirən polis etirazçılara yolun hərəkət hissələrini tərk etməyi əmr edib. Bəzi etirazçılar polisin xəbərdarlığına məhəl qoymayıb və yenidən yolları kəsiblər. Bildirilir ki, polis aksiyanı dağıtmaq üçün gözyaşardıcı qazdan istifadə edib.
Qeyd edək ki, Çin qanunverici orqanının mayın 28-də başa çatan illik sessiyasında Honkonq xüsusi inzibati bölgəsinin hüquq sisteminin və qanunvericilik mexanizmlərinin təkmilləşdirilməsi ilə bağlı qanunun, habelə Honkonqun qanunvericilər şurasında dövlət himni ilə bağlı qanunun qəbuluna etiraz olaraq şəhərdə bir neçə dəfə qanunsuz aksiyalar keçirilib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
