İcbari tibbi sığorta ilə dərman vasitələrinin təminatı üçün apteklərlə müqavilə bağlanacaq
Bakı, 28 dekabr, AZƏRTAC
Ambulator dərman vasitələrinin təminatına 2025-ci ilin 6 ayı üzrə 40 milyon manat məbləğində vəsaitin ayrılması nəzərdə tutulub.
AZƏRTAC xəbər verir ki, bu barədə İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentinin rəhbəri Aynurə Əhmədova media nümayəndələri üçün tibbi savadlılıq təlimində bildirib.
Onun sözlərinə görə, dərman təminatı xəstələrin sosial rifahının yaxşılaşdırılmasına kömək edəcək: “Dərman vasitələrinin təminatı ilk olaraq ürək-damar sistemi, həzm problemi və digər xəstəliklər üçün nəzərdə tutulur. Eyni zamanda, ambulator şəraitdə istifadə edilən dərman vasitələrinin pozitiv siyahısı hazırlanacaq, pozitiv siyahıya daxil olan dərmanlar üçün sığorta ödənişi şərti kompensasiya məbləği əsasında həyata keçiriləcək. Agentlik ilə aptek təşkilatları arasında müqavilələrin bağlanması nəzərdə tutulur. Müqaviləli apteklər yalnız elektron informasiya ehtiyatına ötürülən reseptlər əsasında dərmanları təmin edəcək”.
A.Əhmədova bu yeniliyin gözlənilən sosial nəticələri barədə də danışıb: “Yenilik dərman vasitələrinin əlçatanlığının, əhalinin sosial təminatının artmasına və keyfiyyətli tibbi xidmətlərin təminatına kömək edəcək”.
Bölmənin digər xəbərləri
