İdarə Heyətinin sədri: İnklüziv şəhərlər artıq qlobal çağırışdır
Bakı, 13 may, AZƏRTAC
Bu gün Bakı Urban Həftəsi çərçivəsində belə vacib mövzunun müzakirəsi xüsusi əhəmiyyət daşıyır. Xüsusilə ona görə ki, Azərbaycan bu il dünyanın ən nüfuzlu urban inkişaf platformalarından biri olan Ümumdünya Şəhərsalma Forumunun On Üçüncü Sessiyasına (WUF13) ev sahibliyi edir. Bu, ölkəmizin dayanıqlı şəhər inkişafı, inklüzivlik və insan mərkəzli yanaşma istiqamətində qlobal dialoqa verdiyi töhfənin göstəricisidir.
AZƏRTAC xəbər verir ki, bunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin İdarə Heyətinin sədri, WUF13 Təşkilat Komitəsinin üzvü Aygün Əliyeva "Şəhərlər hamı üçün - Heç kim kənarda qalmasın" adlı tədbirdə çıxış edərkən deyib.
O bildirib ki, agentlik də WUF13 Təşkilat Komitəsinin üzvü olaraq bu prosesdə fəal iştirak edir və hesab edir ki, dayanıqlı şəhərlərin qurulması yalnız müasir infrastruktur deyil, eyni zamanda, insanlara bərabər imkanların yaradılması ilə mümkündür: "Azərbaycanda, xüsusilə işğaldan azad edilmiş ərazilərdə həyata keçirilən genişmiqyaslı yenidənqurma işləri müasir və dayanıqlı şəhərsalma nümunəsi kimi diqqət çəkir. Qarabağ və Şərqi Zəngəzurda “Ağıllı şəhər” və “Ağıllı kənd” konsepsiyaları əsasında qurulan yaşayış məntəqələri gələcəyin inklüziv yaşayış modelini formalaşdırır. Bu baxımdan Ağalı kəndi xüsusi qeyd olunmalıdır. Burada tətbiq edilən “Ağıllı kənd” modeli müasir texnologiyalar, ekoloji yanaşma və rahat yaşayış prinsipləri ilə yanaşı, insanların təhlükəsiz, əlçatan və keyfiyyətli mühitdə yaşamasını hədəfləyir. Bu layihələr göstərir ki, Azərbaycan azad edilmiş torpaqlarda yalnız yenidən quruculuq deyil, həm də yeni və müasir urban inkişaf modeli yaradır. Bu prosesdə vətəndaş cəmiyyəti institutlarının rolu da mühümdür. Dövlət qurumları ilə yanaşı, QHT-lər ictimai maarifləndirmə, sosial təşəbbüslər və inklüzivliyin təşviqi istiqamətində mühüm fəaliyyət göstərir. Bu baxımdan bugünkü tədbirin təşkilatçıları olan Azərbaycan Əlilliyi olan Şəxslərin Təşkilatları İttifaqı və Vətəndaşların Sosial Rifahı Naminə İctimai Birliyi xüsusi təşəkkürə layiqdirlər. Bu gün burada müxtəlif ölkələrdən olan ekspertlərin iştirakı da göstərir ki, inklüziv şəhərlər artıq lokal deyil, qlobal çağırışdır. Təcrübə mübadiləsi və beynəlxalq əməkdaşlıq bu istiqamətdə böyük əhəmiyyət daşıyır. Əminəm ki, WUF13 çərçivəsində keçirilən bu kimi tədbirlər gələcəkdə daha əlçatan, ədalətli və heç kimin kənarda qalmadığı şəhərlərin qurulmasına mühüm töhfə verəcək".
Müxbir - Günel Türksoy
Bölmənin digər xəbərləri
