Martın 23-də İmişli rayonunda şəkər zavodunun təntənəli açılış mərasimi olmuşdur. Azərbaycan Prezidenti İlham Əliyev mərasimdə iştirak etmişdir. Mərasimə toplaşanlar dövlətimizin başçısını hərarətlə qarşıladılar.

“Azərsun Holdinq” Şirkətlər Qrupunun prezidenti Abdulbari Gözal zavod barədə məlumat verdi. Bildirildi ki, Azərbaycanda sənaye və kənd təsərrüfatı sektorunun inkişafına mühüm təkan verəcək bu zavodla yanaşı, bir neçə köməkçi müəssisə də fəaliyyət göstərəcəkdir. Zavodun inşasına 2003-cü ildə xalqımızın ümummilli lideri Heydər Əliyevin xeyir-duası ilə başlanmışdır. Müəssisənin işə salınması kənd təsərrüfatının digər sahələrinin də inkişafına, işsizliyin aradan qaldırılmasına kömək edəcəkdir.

Zavodda tikinti-quraşdırma işlərində çalışanların 90 faizini Azərbaycan vətəndaşları, 10 faizini isə Türkiyə, Ukrayna, Çexiya, Polşa, Almaniya və İran mütəxəssisləri təşkil etmişdir. 2006-cı ildə Azərbaycanda şəkər tozu istehlakının 180-200 min ton olacağını nəzərə alsaq, zavod bu tələbatı tam ödəyəcək və xarici ölkələrə də məhsul ixrac olunacaqdır.

Azərbaycan Prezidenti İlham Əliyev xüsusi düyməni basdı və Qafqazda yeganə olan şəkər zavodunu işə saldı. Sonra dövlətimizin başçısı avtobusla zavodun ərazisini gəzdi, çuğundurun yuyulması və anbarlara göndərilməsi prosesini izlədi, suyun duruldulması üçün tikilmiş hovuzlara, müxtəlif istehsal sahələrinə baxdı.

Ümumi tanışlıqdan sonra Azərbaycan Prezidenti zavodun rəsmi açılışını bildirən lenti kəsdi, inzibati binanın iş otaqlarına, laboratoriyalara baxdı və burada yaradılmış şəraiti yüksək qiymətləndirdi.

Sonra zavodun açılışına həsr olunmuş təntənəli mərasim keçirildi. Rayon icra hakimiyyətinin başçısı ƏBÜLFƏZ AĞAYEV mərasimi açaraq dedi:

- Möhtərəm cənab Prezident!

Hörmətli xanımlar və cənablar!

Bu gün İmişli rayonu əhalisinin sevincinin həddi-hüdudu yoxdur. Sizin rayonumuza gəlişiniz əhali arasında yüksək əhval-ruhiyyə yaratmışdır.

Cənab Prezident, respublikamızın sosial-iqtisadi inkişafı ilə bağlı apardığınız uğurlu siyasət ölkəmizin bütün regionlarında olduğu kimi, İmişli rayonunda da öz bəhrəsini verir.

Regionların sosial-iqtisadi inkişafı Dövlət Proqramına uyğun olaraq, son iki ildə İmişli rayonunda 20 istehsal obyekti, 286 kommersiya və xidmət obyekti tikilib istifadəyə verilmiş, 4246 yeni iş yeri açılmışdır. Bütün bunların nəticəsidir ki, 1990-1992-ci illərdə iş axtarmaq üçün rayondan getmiş insanlar indi işləmək üçün öz doğma yurdlarına qayıdırlar. 2004-cü ildə 46 ailə, 2005-ci ildə isə 191 ailə rayonumuza qayıtmışdır. Əlbəttə, bu, son hədd deyildir. Rayonumuzda aqrar sahənin inkişafına xüsusi diqqət yetirilir. Bu il 5 min hektar sahədə şəkər çuğunduru əkiləcəkdir.

Cənab Prezident!

Sizin neft strategiyasını uğurla həyata keçirməyiniz, neftdən gələn gəlirlərin müəyyən hissəsini qeyri-neft sektoruna yönəltməyiniz aqrar sahənin inkişafına, fermerlərin gübrələrə və yeni texnikaya olan ehtiyaclarının ödənilməsinə güclü təkan vermişdir.

Dahi öndərimiz Heydər Əliyevin İmişlidə dörd dəfə səfərdə olmasını rayon sakinləri dərin minnətdarlıq hissi ilə xatırlayırlar. Bu gün açılışına toplaşdığımız Azərbaycanın ilk şəkər zavodunun da əsası ümummilli liderimiz Heydər Əliyevin xeyir-duası ilə qoyulmuşdur. Bu müəssisənin istifadəyə verilməsi təkcə İmişlinin deyil, ölkəmizin bütün regionlarının sosial-iqtisadi inkişafında mühüm rol oynayacaqdır.

Regionda şəkər çuğundurunun əkilib becərilməsi ilə məşğul olan insanları da nəzərə alsaq, şəkər zavodunun istifadəyə verilməsi 150 min yeni iş yeri deməkdir.

Rayonumuzda pambıqçılığın inkişafı üçün də geniş imkanlar vardır. Hər iki sahənin paralel inkişafı fermerlər üçün sərbəst seçim şəraiti yaradır. Bu isə, onların maddi vəziyyətinin yaxşılaşmasına kömək edəcəkdir.

Ötən il rayonumuzda 5 orta məktəb binası tikilib istifadəyə verilmiş, 8500 yerlik stadionun tikintisi başa çatdırılmışdır. Cari ildə daha 10 orta məktəb binasının, Qarabağ əlilləri və şəhid ailələri üçün 16 mənzilli 2 yaşayış binasının tikilməsi nəzərdə tutulmuşdur. İmişli şəhərində qazlaşdırma işlərinin aparılması, 330 kv-luq 2-ci İmişli-Parsabad elektrikötürmə xəttinin inşasına başlanması rayonun sosial-iqtisadi inkişafına müsbət təsir göstərəcəkdir.

Cənab Prezident, bütün bunlar Sizin yorulmaz fəaliyyətinizin, apardığınız uğurlu daxili və xarici siyasətin nəticəsidir. Bu, həm də Sizin İmişli gənclərinə, bütövlükdə İmişli camaatına göstərdiyiniz qayğının bariz nümunəsidir.

Möhtərəm cənab Prezident!

İmişli rayonu ictimaiyyətinin Sizə olan məhəbbət və ehtiramı tükənməzdir. Sizi əmin edirəm ki, bundan sonra da ətrafınızda sıx birləşəcək, qarşıya qoyulan vəzifələrin vaxtında icra olunmasına çalışacaq, bu yolda bütün qüvvəmizi sərf edəcəyik.

Sonra “Azərsun Holdinq”in prezidenti ABDULBARİ GÖZAL çıxış edərək dedi:

- Möhtərəm cənab Prezident!

Hörmətli qonaqlar!

Bu gün ümummilli liderimiz mərhum Heydər Əliyevin böyük arzularından biri olan, Azərbaycan Respublikasının hər bir vətəndaşının firavan yaşamasına kömək edəcək nəhəng sənaye obyektinin işə düşməsinin şahidi olursunuz.

Bu müəssisənin sənayecə az inkişaf etmiş İmişlidə tikilməsinə qərar verilməsi mərhum Heydər Əliyevin uzaqgörənliyi və dahiliyinin təzahürüdür.

Hörmətli cənab Prezident!

İcazə verin, zavod haqqında zati-alinizə və qonaqlarımıza qısa məlumat verim. İmişli şəkər zavodu 27 aya tikilmişdir. Tikinti müddətində gündəlik 1800-2500 nəfər çalışmışdır. 5 min avtomatik nəzarət nöqtəsi var. Turbin generatorunun gücü 12 meqavatdır. İlk mərhələdə gündə 6000 ton çuğundur emal ediləcək, 900 ton şəkər tozu istehsal olunacaqdır. Hazırda işçilərin sayı 1100 nəfər, orta əməkhaqqı 250 manatdır. Gələcəkdə gündə 9000 ton çuğundur emal ediləcək, 1500 ton şəkər tozu istehsal olunacaq, işçilərin sayı 1400 nəfərə çatacaqdır. İndiyədək müəssisəyə 87 milyon dollar sərmayə qoyulmuşdur.

Hörmətli cənab Prezident!

Sizə məlum olduğu kimi, indi əkinçiliyi köhnə qayda ilə inkişaf etdirmək mümkün deyildir. Ona görə yüksək texnologiya ilə yanaşı, yeni texnika, avadanlıq və bununla bərabər bilik də tələb olunur.

Kənd təsərrüfatına əsaslanan belə nəhəng müəssisələrin yaradılması, özü ilə bərabər texnoloji nou-hou və bilik də gətirir. İndi Azərbaycan Şəkər İstehsalat Birliyi dünyanın müxtəlif ölkələrindən toxum növləri, texniki avadanlıq gətirir və mütəxəssislər cəlb edir. Bu ona görədir ki, müəssisə ehtiyacı olan xammalla özünü təmin etsin.

Möhtərəm cənab Prezident!

“Azərsun Holdinq” bu nəhəng sərmayə layihələri ilə Azərbaycanın qeyri-neft sektorunda üzərinə düşən işləri görür. Sizin iqtisadi inkişaf strategiyanızı və Azərbaycandakı sabitliyi nəzərə alaraq, bu layihələri ciddi şəkildə həyata keçiririk.

Gələcəkdə soya, raps, günəbaxan, qarğıdalı emal edən, şəkər çuğundurundan çıxan cecədən yem hazırlayan müəssisələr də yaradacağıq. Zavodda şəkər istehsalı ilə yanaşı, xəmir mayası, yeyinti spirti, limon turşusu və s. qiymətli məhsullar istehsal etmək imkanları da mövcuddur. Zavodun illik tələbatını ödəmək üçün 20 min hektar sahədə çuğundur əkdirəcək, mal-qara və toyuq yeminin istehsalını təşkil edəcəyik. Bu da ölkədə ət və süd məhsulları bolluğunun yaradılmasına və əlavə çoxlu iş yerlərinin açılmasına səbəb olacaqdır.

Ümumiyyətlə, 80 min hektar əraziyə bu müəssisə tərəfindən rəhbərlik ediləcəkdir. Əgər hər hektarda 2 ailə başçısının çalışacağını nəzərdə tutsaq, deməli, 160 min ailə bunun bəhrəsini görəcəkdir.

Digər tərəfdən, indiyə qədər Azərbaycanın bu regionunda kənd əhalisinin əsas məşğuliyyəti pambıqçılıq idi. İndi isə şəkər çuğunduru əkinləri pambıq sahələri qədər olacaqdır. Bu da əkinçilərin xeyrinədir.

Hörmətli cənab Prezident!

Zati-alinizin regionların sosial-iqtisadi inkişafı proqramı çərçivəsində kənd təsərrüfatı məhsulları istehsalına xüsusi diqqət yetirməyiniz sayəsində, enerji sektorunda olduğu kimi, sizin rəhbərliyinizlə Azərbaycan bu sahədə də uğurlar qazanmaqdadır.

Tarixdə həmişə millətlərin durğunluq və inkişaf zamanı vardır. Sizin iqtisadi siyasətiniz Azərbaycan xalqını ayağa qaldırmışdır və hər bir kəs çalışmaqdadır.

Əziz qonaqlarımıza bir misal çəkmək istəyirəm. 1992-ci ildə biz qaçqın-köçkünlərə Almaniyadan yardım kimi göndərilən evləri quraşdırarkən, bir bölgədə icra hakimiyyəti protokol üçün Azərbaycan bayrağını asmağımıza kömək etməyi bacarmadı.

Ancaq Sizin inkişafa istiqamətləndirilmiş təşəbbüsünüz və fəlsəfəniz sayəsində indi icra hakimiyyətlərinin başçıları biznesmenləri şəhərin mərkəzi küçələrində qarşılayırlar. Çox önəmli rəqabət yaranıb - hər kəs öz rayonunda iş yeri açmaq istəyir. Bu, Sizin müəyyən etdiyiniz məqsəddir, vəsaitini, beynini və vaxtını sərf edən sərmayədar üçün böyük bir mənəvi dəstəkdir.

Artıq Azərbaycan hökumətinin rəsmi qurumlarının hamısı sizin fəlsəfənizi yaxşı anlamışlar. Ona görə də bu fürsətdən istifadə edərək, şəkər zavodunun inşasında işləri ləngitməyən və əllərindən gələn köməyi əsirgəməyən dövlət orqanlarının - Gömrük Komitəsinin, Nəqliyyat Nazirliyinin, “Azərenerji”nin, “Azəriqaz”ın və yerli icra hakimiyyətinin rəhbərlikləri və əməkdaşlarının bu sahədə zəhmətlərinin olduğunu vurğulamaq istəyirəm. “Azərsun” qrupu olaraq, Sizə minnətdarlığımızı, əlaqədar təşkilat və şəxslərə təşəkkürümüzü bildiririk.

Hörmətli cənab Prezident!

İcazə verin, bununla çıxışımı başa çatdırım.

Azərbaycan Respublikası regionlarının sosial-iqtisadi inkişafı proqramının həyata keçirilməsinin bariz nümunəsi olan, bu bölgənin iqtisadiyyatında mühüm rol oynayacağına inandığımız şəkər zavodunun açılışında zati-alinizin iştirak etməsi ilə bizi şərəfləndirdiyinizə görə “Azərsun Holdinq” qrupu adından Sizə bir daha minnətdarlığımızı bildiririk.

Cənabi-Haqqdan Sizə cansağlığı arzulayırıq.

Diqqətinizə görə təşəkkür edirəm.

X X X

Azərbaycan Prezidenti İlham Əliyev mərasimdə nitq söylədi.