İndiyədək 93 dövlət qurumunun informasiya sistemlərinin tam və ya qismən miqrasiyası yekunlaşdırılıb
Bakı, 13 aprel, AZƏRTAC
Bu günədək rəqəmsallaşma prosesini tamamlayan və miqrasiyaya hazır olan 93 dövlət qurumunun informasiya sistemlərinin tam və ya qismən miqrasiyası yekunlaşdırılıb.
AZƏRTAC xəbər verir ki, bu barədə “AzInTelecom” MMC-nin İdarə heyəti sədrinin müşaviri Sadiq Yolçuyev “Dayanıqlı inkişaf üçün texnologiyalar: Dördüncü Sənaye İnqilabı texnologiyaları və bulud həlləri” tədbirində deyib.
Bildirilib ki, “AzInTelecom” MMC dövlətə məxsus Data mərkəzləri üzərindən tətbiq edilən bulud texnologiyaları əsasında dövlət qurumlarının “Hökumət buludu”na miqrasiyasını həyata keçirir.
Hazırda “AzInTelecom” MMC “Hökumət buludu”nun təhlükəsizliyinin gücləndirilməsi üçün şəbəkə sisteminin təkmilləşdirilməsi məqsədilə Xüsusi Rabitə və İnformasiya Təhlükəsizliyi Dövlət Xidməti ilə birgə işlər həyata keçirmək istiqamətində danışıqlar aparır.
S.Yolçuyev vurğulayıb ki, “AzInTelecom” MMC bulud xidmətlərinin genişləndirilməsi və təkmilləşdirilməsi məqsədilə qabaqcıl ölkələrin təcrübəsini daim öyrənir və bu istiqamətdə həyata keçirilən işlərdən biri olaraq 2022-ci ilin avqust ayında “Bulutistan” şirkəti ilə memorandum imzalanıb. Memoranduma əsasən, bulud həllərinin Azərbaycanda və regionda inkişafı üzrə birgə əməkdaşlıq fəaliyyəti nəzərdə tutulur.
Bölmənin digər xəbərləri
