İORDANİYA HÖKUMƏTİ İRAQA TƏQRİBƏN 2,5 MİN QƏDİM ƏŞYA QAYTARIR
AZƏRTAC xəbər verir ki, İordaniya hökuməti 2.466 qədim əşyanı İraqa qaytarır. Həmin əşyalar ABŞ ordusunun komandanlığı altında koalisiya qüvvələrinin ölkəyə müdaxiləsinin başlandığı vaxtdan oğurlanmışdı. İraqın turizm və arxeologiya naziri Muhəmməd Abbas Auraybi jurnalistlərlə görüşündə bildirmişdir ki, bütün qiymətli əşyalar yaxın günlərdə qablaşdırılıb Bağdada göndəriləcəkdir.
Arxeolojı və tarixi dəyəri olan bütün əşyalar son bir neçə ay ərzində İordaniya hüquq mühafizə orqanları tərəfindən aparılmış bir neçə xüsusi əməliyyat nəticəsində qaçaqmalçılardan müsadirə edilmişdir. Artefaktlar arasında gümüş sikkələr, boyunbağılar, qədim şumer yazıları olan kağızlar, saxsı qab-qacaq və digər əşyalar vardır.
Bundan əvvəl Suriya da bu cür xoşməramlı addım atmışdır.
İndiyədək İraqa onun hüdudlarından kənara çıxarılmış 8,5 min qiymətli əşya qaytarılmışdır.
İraqın Turizm və Arxeologiya Nazirliyinin məlumatına görə, ABŞ-ın müdaxiləsindən bəri ölkə təqribən 15 min qədim əşyadan məhrum olmuşdur.
Bölmənin digər xəbərləri
