İPƏK YOLU LAYİHƏSİNİN YENİDƏN CANLANMASI AVRASİYA MƏKANI ÜÇÜN ÇOX MÜHÜMDÜR
AZƏRTAC-ın xüsusi müxbiri xəbər verir ki, İqtisadi Əməkdaşlıq Təşkilatının Pakistanda keçirilən 9-cu geniş iclasında çıxış edən Türkiyənin təşkilatdakı nümayəndəsi Həsən Ərkoç İpək Yolu layihəsinin yenidən canlanmasının Avrasiya məkanı və bölgə üçün çox mühüm əhəmiyyətə malik olduğunu söyləmişdir.
Azərbaycan, Türkiyə və Gürcüstanın birgə səyləri nəticəsində həyata keçirilən Bakı-Tbilisi-Qars dəmir yolu layihəsinin gələcəkdə İƏT-ə üzv ölkələr arasında ticarət əlaqələrini daha da gücləndirəcəyini diqqətə çatdıran Həsən Ərkoç bildirmişdir ki, yaxın 10 ildə bu yolun dəyəri daha da artacaqdır. Çinin və digər Uzaq Şərq ölkələrinin iqtisadi gücünün daha da artığı bir zamanda tarixi İpək Yolu uzun əsrlərdən sonra dünyanın ən vacib nəqliyyat dəhlizi olacaqdır.
Türkiyəli nümayəndə əlavə etmişdir ki, bölgədə öz xalqının rifahını düşünən və gələcəyə baxan hər bir ölkə bu layihənin məsuliyyətini dərk etməli və onun həyata keçirilməsi üçün səylərini əsirgəməməlidir.
Bölmənin digər xəbərləri
