İranda sosial şəbəkələrdə fəallıq nümayiş etdirən tanınmış şəxslərdən vergi alınacaq

21.08.2021 [12:53]
Çap et
A⁺ A^-

Tehran, 21 avqust, AZƏRTAC

İranda sosial şəbəkələrdə fəallıq nümayiş etdirən tanınmış və nüfuzlu şəxslərdən vergi alınacaq.

AZƏRTAC İranın milli vergilər xidmətinin açıqlamasına istinadla xəbər verir ki, hər hansı bir platformada izləyicisi 500 mindən artıq olan istifadəçidən vergi tutulacaq.

Məsələnin mahiyyəti ondan ibarətdir ki, istifadəçilər sosial şəbəkələr vasitəsilə reklam kampaniyaları həyata keçirərək gəlir əldə edirlər. Vergi Xidməti yaxın günlərdə istifadəçilərin adlarını və verginin həcmini müəyyən edən sənəd hazırlayıb Maliyyə Nazirliyinə təqdim edəcək. Daha sonra qanun layihəsi hazırlanıb parlamentin müzakirəsinə çıxarılacaq və qanun qəbul olunacaq. Vergilər Xidmətinin açıqlamasına əsasən 2022-ci ildən başlayaraq sosial şəbəkə istifadəçilərindən vergi tutulacaq.

Rabil Kətanov

AZƏRTAC-ın xüsusi müxbiri

Tehran