İRANIN AZƏRBAYCANDAKI SƏFİRİ ƏHƏD QƏZAİNİN ÇIXIŞI
-Bismillahir-rəhmanir-rəhim!
Azərbaycan Respublikasının möhtərəm Prezidenti cənab Heydər Əliyev!
Hörmətli qonaqlar, iranlı və azərbaycanlı bacı-qardaşlar!
Bu gün İran inqilabının 24-cü ildönümüdür və bu münasibətlə biz buraya toplaşmışıq. İranda qəməri təqvimi ilə bu gün həm də Qurban bayramıdır. Biz bu bayram münasibətilə cənab Prezident Heydər Əliyevi srağagün, dünən təbrik etmişik və bu gün də bir daha təbrik etmək istəyirəm. Eyni zamanda burada iştirak edənləri, Azərbaycan xalqını, bütün müsəlmanları bu əziz gün münasibətilə təbrik edirəm.
Cənab Prezident, İran inqilabından 24 il keçir. Bu inqilab İran iqtisadiyyatına, siyasətinə çox böyük təkan vermişdir. İndi İran regionda özünə xas mövqeyinə görə təzyiqdə olsa da, amma iqtisadi, siyasi cəhətdən inkişafını davam etdirir.
İran xarici siyasətində bütün qonşularla, dünya ilə münasibətlərini yaxşılaşdırmaq və inkişaf etdirmək xətti aparır. Amma Azərbaycan dost, qardaş və qonşu ölkədir. Qonşu ölkələrin heç birinin İranla müştərək, hərtərəfli, tarixi, mədəni, hətta din və dil cəhətdən Azərbaycan qədər yaxınlığı yoxdur. Ona görə bu, iki ölkə üçün öz münasibətlərini inkişaf etdirməyin nə qədər vacib olduğunu göstərir.
Sevindirici haldır ki, 2002-ci ilin may ayında Sizin İrana səfərinizdən sonra bu münasibətlər hərtərəfli sürətlə inkişafdadır. Sizin o səfəriniz doğrudan da böyük tarixi hadisədir. Səfər zamanı iki ölkənin münasibətlərində böyük addım atıldı və orada cənab Xatəmi ilə Siz ölkələrimiz arasında sənədlər imzaladınız. Ondan sonra həm Azərbaycan, həm də İran məhsullarının daşınmasında və s. problemlər yoxdur. İndi Azərbaycan xalqı və İran xalqı həmin səfərin nəticələrindən bəhrələnir və bu, göz qabağındadır. Xüsusən Azərbaycanda yaşayan iranlılar bunu hərtərəfli hiss edirlər. O səfərin nəticəsi kimi, iki ölkənin prezidentlərinin imzaladıqları sənədlər niyyətləri əks etdirmiş və sübuta yetirmişdir.
Bunların nəticəsində bu gün Azərbaycanda olan işgüzar adamlar burada yaranan şəraitdən faydalanır, öz işlərini yaxşı, rəvan şəkildə irəliyə aparırlar. Buna görə də İranın ticarət və iş adamlarının nümayəndəsi yadigar olaraq Sizə hədiyyə hazırlayıbdır. İndi onu Sizə təqdim edəcək və onlara yaratdığınız gözəl şəraitə görə Sizə təşəkkür edəcəkdir.
Dünən də bizim milli bayramımız keçirildi. Ancaq dünən Azərbaycanda rəsmi tətil olduğuna görə və milli tətil olduğuna görə, cənab Prezident məsləhət gördü ki, protokol qaydasına uyğun bugünkü mərasimdə iştirak etsin. Bu da onu göstərir ki, cənab Prezident Heydər Əliyev İran-Azərbaycan münasibətlərinə nə qədər diqqət, qayğı göstərir, iki ölkənin münasibətlərini yüksək səviyyədə tutur. Baxmayaraq ki, bugünkü mərasim cənab Prezidentin proqramında yox idi, amma başqa görüşlərini, gərgin iş proqramını kənara qoydu və vaxt ayırıb mərasimə gəldi.
Mən buna görə hörmətli Prezidentə dərin minnətdarlığımı bildirirəm. İndi hörmətli Prezidentin dəyərli məsləhətlərindən istifadə etmək üçün mən sözü cənab Heydər Əliyevə verirəm. Çıxışımı bitirərək İranın ticarət və iş adamları adından hədiyyəni hörmətli Prezidentə təqdim etmək üçün ağayi Səlamiyəni səhnəyə dəvət edirəm. Sağ olun.
X X X
İranın Azərbaycanda fəaliyyət göstərən ticarət və iş adamları adından ağayi ƏMİRŞAHRUX SƏLAMİYƏN Azərbaycan Prezidenti Heydər Əliyevə yadigar olaraq xatirə hədiyyəsi təqdim etdi və dedi:
-Mən Azərbaycanda olan İranlı iş adamlarının nümayəndəsi kimi bu hədiyyəni möhtərəm cənab Heydər Əliyevə təqdim etməyə icazə verdiyinə və şərait yaratdığına görə cənab səfirimizə minnətdarlığımı bildirirəm.
Möhtərəm Prezidentə iki hədiyyə təqdim olundu. Bu hədiyyənin biri cənab səfirin qeyd etdiyi münasibətlə əlaqədar idi. Mən iqtisadi və hüquqi sahədə bir sıra kəskin problemlərlə üzləşmişdim və cənab Heydər Əliyevin mənə göstərdiyi qayğı sayəsində öz fəaliyyətimi bərpa edə bildim. Möhtərəm Heydər Əliyev Prezidentliyi müddətində bizə və digərlərinə burada fəaliyyətləri üçün gözəl şərait yaratmışdır. İkinci hədiyyə bununla bağlı minnətdarlıq əlamətidir.
Fikrimi bu sözlərlə yekunlaşdırmaq istəyirəm ki, cənab Heydər Əliyev qat-qat böyük, dünyanın ən böyük siyasi məkanının, sabiq SSRİ-nin idarəçiliyinə qabil insan olmuşdur və indi öz ölkəsini belə gözəl idarə etməsi onu sevənlər üçün böyük iftixar mənbəyidir.
X X X
Azərbaycan Prezidenti Heydər Əliyev mərasimdə nitq söylədi. \Dövlətimizin başçısının nitqi qəzetin bugünkü nömrəsinin birinci səhifəsində dərc olunur\.
X X X
Axırda incəsənət ustalarının iştirakı ilə bayram konserti oldu.
Mərasimdə Prezidentin Katibliyinin rəisi Dilarə Seyidzadə, Milli Məclisin deputatları və digər rəsmi şəxslər iştirak edirdilər.
Foto Yaşar Xəlilovun və
Rafiq Bağırovundur
Bölmənin digər xəbərləri
