“İSİM könüllüsü ol!” proqramı iki ay davam edəcək
Bakı, 2 aprel, AZƏRTAC
Səhiyyə Nazirliyinin İctimai Səhiyyə və İslahatlar Mərkəzi “İSİM könüllüsü ol!” şüarı altında səhiyyədə könüllülük anlayışının gənclər arasında təbliği və gənclərin səhiyyə və sağlamlıq sahəsində könüllü fəaliyyətə təşviq edilməsi, eyni zamanda “Azərbaycan gəncliyi 2017-2021-ci illərdə” Dövlət Proqramının 5.7.5. (Gənclər arasında könüllülük fəaliyyətinin daha geniş təşviq edilməsi) bəndinin icrasına dəstək olmaq məqsədilə may və iyun aylarında davam edəcək iki aylıq könüllülük proqramını həyata keçirməyə başlayır.
Mərkəzdən AZƏRTAC-a verilən məlumata görə, onlayn müraciət forması əsasında müsahibə mərhələsinə dəvət olunan və həmin mərhələni uğurla keçən iştirakçılarla könüllülük müqaviləsi bağlanılacaq.
Proqram çərçivəsində gənclərə asudə vaxtın səmərəli dəyərləndirilməsi, şəxsi bacarıqların təkmilləşdirilməsi, ictimai səhiyyə sahəsində iş təcrübəsi qazanılması və komanda ilə işləmək bacarığının artırılması istiqamətində təlimlər keçiriləcək. Eyni zamanda, könüllülər seçdikləri istiqamət üzrə İSİM-in fəaliyyətinə qoşulacaq və layihə idarəetməsi, təlimçilik bacarıqlarının inkişaf etdirilməsi imkanı qazanacaqlar.
Könüllülük mühüm əhəmiyyətə malik olan fəaliyyət növlərindən biri kimi cəmiyyətin inkişafında xüsusi əhəmiyyət daşıyır. Ölkəmizdə könüllü fəaliyyətin təbliği və gənclərin könüllü fəaliyyətə təşviq edilməsi məqsədilə müxtəlif layihələr həyata keçirilir. Həmin layihələrin nəticəsində ölkəmizdə həyata keçirilən bir çox beynəlxalq tədbirlərdə gənclər könüllü fəaliyyət göstəriblər.
Gənclər arasında səhiyyədə könüllülük anlayışının formalaşdırılması, xüsusilə, səhiyyə və sağlamlıq istiqaməti üzrə tibb tələbələrinin könüllü fəaliyyətə təşviq edilməsi və onların arasında daha geniş maarifləndirmə işləri aparmaq mühüm əhəmiyyət kəsb edir. Ona görə də gələcək fəaliyyətini ictimai səhiyyə sahəsində qurmaq istəyən hər bir gənci, xüsusilə tibb ixtisası üzrə təhsil alan tələbələri “İSİM könüllüsü ol!” təcrübə proqramına qoşulmağa dəvət edirik.
Könüllülük proqramında iştirak etmək üçün bu il aprelin 20-dək https://forms.gle/nFotpAgEUFZLQ8hT7 linki vasitəsilə qeydiyyatdan keçmək lazımdır.
Bölmənin digər xəbərləri
