İŞİNİN VURĞUNU OLAN İNSAN
Müdriklərdən kimsə deyib ki, əgər insan hər səhər evdən işə, axşam, işdən sonra isə evə, ailəsinin yanına tələsirsə, o, xoşbəxtdir. Bu fikri Azərbaycan Dövlət Teleqraf Agentliyinin - AZƏRTAC-ın çoxsaylı qadın əməkdaşlarından birinə - korrektorluq bölməsinin müdiri Bətul xanım Eyvazlıya da aid etmək olar. Avqustun 5-də Bətul xanım öz yubileyini qeyd edəcəkdir. Ailəsi üçün əvəzsiz xanım, qayğıkeş ana və nənə olan bu qadın agentlikdə işlədiyi müddətdə həmkarlarının səmimi hörmətini və məhəbbətini qazanmışdır. Peşəkarlığına və işə vicdanlı, məsuliyyətli münasibətinə görə onu çox yüksək qiymətləndirirlər. Bu əlamətdar gündə AZƏRTAC-ın bütün əməkdaşları adından Bətul xanımı təbrik edir, ona cansağlığı, xoşbəxtlik arzulayırıq.
Bətul xanım beş ildir ki, AZƏRTAC-da işləyir. Burada əməkdaşlardan müstəsna məsuliyyət hissi, əməksevərlik, yüksək savad kimi məziyyətlərlə yanaşı, həm də ən yaxşı insani keyfiyyətlər, ziyalılıq, ünsiyyətcillik tələb olunur. Bəlkə də elə buna görə agentlikdə hər bir iş günü maraqlı və məzmunlu keçir.
Bətul xanımın rəhbərlik etdiyi bölmə AZƏRTAC-da ən mürəkkəb və məsul sahələrdən biridir. Gün ərzində hazırlanan bütün informasiya bu bölməyə daxil olur, burada diqqətlə oxunduqdan sonra, necə deyərlər, son məhsula çevrilərək ən müxtəlif ünvanlara yayılır. İşin həcminin çox olması bütün əməkdaşlardan yüksək peşəkarlıq və öz xidməti vəzifələrinə vicdanla yanaşmağı tələb edir.
Bu gün korrektorluq bölməsi müasir kompyuterlərlə təchiz olunmuşdur, lakin işin həcmi və məsuliyyət dərəcəsi əsla azalmamışdır.
İş elə gətirib ki, bu bölmədə əzəldən, əsasən, qadınlar çalışır. Yaş etibarilə müxtəlif nəsillərin nümayəndələri olan bu insanların hərəsinin özünəməxsus xarakteri, temperamenti, dünyabaxışı olsa da, onları səciyyələndirən əsas xüsusiyyət tapşırılmış işə məsuliyyət hissidir. Bir də ki, bu gözəl qadınların AZƏRTAC-da, xüsusən korrektorluq bölməsində işləməsi isə həqiqətən tale yazısıdır.
Bətul xanım belə bir “narahat təsərrüfat”a rəhbərlik edir və ona həvalə edilmiş vəzifənin öhdəsindən şərəflə gəlir. İlk növbədə özünə, sonra isə ətrafdakılara münasibətdə tələbkar, eyni zamanda, çox səmimi və xeyirxah insan kimi tanıdığımız Bətul xanım xalis peşəkar xarakterli məsələlərlə yanaşı, həyatın özündən irəli gələn mürəkkəb məsələləri də həll etməli olur. Onu da deyək ki, o, gənc, hələ kifayət qədər təcrübəsi olmayan əməkdaşlara həssaslıqla qayğı göstərir.
Həyatda elə insanlar var ki, onlarla hər bir görüşü sevinc və səbirsizliklə gözləyirsən. Azərbaycan qadınlarının gözəl nümayəndələrindən biri olan Bətul xanım məhz bu cür insandır. Onunla işləmək, sadəcə, ünsiyyətdə olmaq insanda həmişə xoş ovqat doğurur.
######
Bölmənin digər xəbərləri
