ELM VƏ TƏHSİL
İtaliyanın Bolonya Universitetinin professoru Azərbaycan Dillər Universitetində olmuşdur
![İtaliyanın Bolonya Universitetinin professoru Azərbaycan Dillər Universitetində olmuşdur](/files/2013/3/1200x630/14071450862658264890_1200x630.jpg)
Bakı, 31 oktyabr (AZƏRTAC). Azərbaycan Dillər Universitetinin (ADU) rektoru, Milli Məclisin deputatı, professor Səməd Seyidov Bakıda keçirilən III Beynəlxalq Humanitar Forumun iştirakçısı, İtaliyanın Bolonya Universitetinin professoru Massimo Biançi ilə görüşmüşdür.
ADU-dan AZƏRTAC-a bildirmişlər ki, görüşdə S.Seyidov III Bakı Beynəlxalq Humanitar Forumu, onun Azərbaycan və digər iştirakçı ölkələr üçün əhəmiyyətindən danışmış, tədbirdə dünyanın müxtəlif ölkələrindən tanınmış elm adamlarının iştirak etdiklərini söyləmişdir. Rəhbərlik etdiyi ali məktəb barəsində qonağa məlumat verən rektor ADU-nun İtaliya universitetləri ilə əməkdaşlığının yaradılmasına hər zaman böyük önəm verildiyini vurğulamış, bu əlaqələrin daha da inkişaf edəcəyinə əminliyini bildirmişdir. S.Seyidov universitetdə italyan dilinin uğurla tədris olunduğunu, tələbələrin bu dilə maraq göstərdiklərini söyləmişdir. ADU-nun İtaliyanın Peruca, Bolonya, Siyena, Venesiya universitetləri ilə əməkdaşlığının əhəmiyyətindən söz açılmış, bu əlaqələrinin ildən-ilə genişləndiyi qeyd edilmişdir.
Professor M.Biançi səmimi görüşə görə təşəkkür etmiş, ADU-da italyan dilinin tədrisini yüksək qiymətləndirmişdir.
Görüşdə əməkdaşlığın perspektivləri, universitetlərarası əlaqələrin inkişafı, birgə tədbirlərin təşkili, tələbə-müəllim mübadiləsi barəsində geniş fikir mübadiləsi aparılmışdır.