Kazanda vaterpolçular arasında kütləvi dava olub
Bakı, 14 fevral, AZƏRTAC
Kazanda vaterpol üzrə Rusiya çempionatının 11-ci turu çərçivəsində yerli “Sintez” komandası ilə Volqoqradın “Spartak” komandası arasında keçirilən matç kütləvi davaya görə dayandırılıb.
AZƏRTAC Rusiya KİV-lərinə istinadla xəbər verir ki, matçın bitməsinə 4 dəqiqə 9 saniyə qalmış bir neçə idmançı Volqoqrad komandasının qapısı yanında əlbəyaxa olub. Ehtiyat idmançılar skamyasında oturanlar onların köməyinə tələsiblər. Komandaların məşqçiləri də hovuzun kənarında tutuşublar. Yarışın hakimi onları ayırıb. Həmin vaxt hesab “Spartak” komandasının xeyrinə 9:6 olub. Arbitrlərin qərarına görə matç dayandırılıb.
İndi hakimlər kollegiyası qərar qəbul etməlidir: qələbə Volqoqrad komandasına verilməli, yoxsa matç yenidən oynanılmalıdır?
Bölmənin digər xəbərləri
