CƏMİYYƏT
Köln şəhərində Almaniyadakı Azərbaycanlı Həkimlərin I forumu işə başlayıb
![](/files/galleryphoto/2022/1/1200x630/16464910066254421421_1200x630.jpg)
![](/files/galleryphoto/2022/1/1200x630/16464910064545719111_1200x630.jpg)
![](/files/galleryphoto/2022/1/1200x630/16464910063515621279_1200x630.jpg)
![](/files/galleryphoto/2022/1/1200x630/16464910064966837892_1200x630.jpg)
![](/files/galleryphoto/2022/1/1200x630/16464910065456712061_1200x630.jpg)
![](/files/galleryphoto/2022/1/1200x630/1646491006106050348_1200x630.jpg)
![](/files/galleryphoto/2022/1/1200x630/16464910062024141329_1200x630.jpg)
![](/files/galleryphoto/2022/1/1200x630/16464910066032352374_1200x630.jpg)
Bakı, 5 mart, AZƏRTAC
Martın 5-də Köln şəhərində Almaniyadakı Azərbaycanlı Həkimlərin I forumu işə başlayıb.
Diasporla İş üzrə Dövlət Komitəsindən AZƏRTAC-a bildiriblər ki, komitəsinin dəstəyi və Almaniya Azərbaycanlıları Alyansının təşkilatçılığı ilə baş tutan tədbirdə Azərbaycanın Almaniyadakı səfiri Ramin Həsənov, Azərbaycan səhiyyə nazirinin müavini Nadir Zeynalov, Azərbaycan Diasporuna Dəstək Fondunun (ADDF) icraçı direktoru Əkrəm Abdullayev, Diasporla İş üzrə Dövlət Komitəsinin (DİDK) əməkdaşları, Almaniyanın 34 şəhərində fəaliyyət göstərən 200-dən çox elm xadimi və həkim iştirak ediblər.
Azərbaycanın Dövlət Himninin səsləndirilməsi ilə başlayan tədbirdə Vətən müharibəsi dövründə həlak olan şəhidlərin, o cümlədən həkimlərin əziz xatirəsi bir dəqiqəlik sükutla yad edilib.
Tədbirdə çıxış edən Almaniya Azərbaycanlıları Alyansının İdarə Heyətinin sədri Nuran Abdullayev bildirib ki, forumu keçirməkdə əsas məqsədlərdən biri uzun illərdir Almaniyanın tibb ocaqlarında çalışan, müəyyən formada nüfuz sahibinə çevrilən azərbaycanlı elm adamları, həkimləri və bu yola başlayan gənc həmkarlarımızı bir araya gətirməkdir. Onlar arasında Almaniyada nümunəvi şəbəkələşməni yaratmaq, həmçinin elmi-praktik mübadilə aparmaq da əsas hədəflərdəndir. Qeyd edilib ki, forumun təşkili Azərbaycan Prezidenti İlham Əliyevin rəhbərliyi ilə güclənən dövlətimizin xaricdə təhsil alan və işləyən azərbaycanlı həkimlərə olan xüsusi diqqət və qayğısının nəticəsidir. Dövlət başçısının bu qayğısının Almaniyadakı həkimlərə çatdırılması istiqamətindəki fəaliyyətinə görə Diasporla İş üzrə Dövlət Komitəsinə minnətdarlıq bildirilib.
Foruma videobağlantı vasitəsilə qatılan Diasporla İş üzrə Dövlət Komitəsinin sədri Fuad Muradov bu ölkədə ilk dəfə təşkil edilən forum iştirakçılarına və tədbirin işinə uğurlar arzulayıb. Bildirib ki, Azərbaycan Prezidenti İlham Əliyevin birbaşa tapşırığı ilə DİDK mühüm layihələr həyata keçirir. Bu layihələr Azərbaycan diasporunun təşkilatlanmasına, mütəşəkkil şəkildə fəaliyyət göstərməsinə çox ciddi şəkildə təsir edir. Komitə sədri layihələrin uğurlu nəticələrindən danışarkən Koordinasiya Şuralarının, Azərbaycan Evlərinin fəaliyyətinə xüsusi diqqət çəkib. DİDK sədri elmi nailiyyətləri ilə Almaniyanın tibb ocaqlarında nüfuz sahibinə çevrilən azərbaycanlı həkimlərin diaspor quruculuğuna qoşulmalarının lobbiçilik fəaliyyətinə və Azərbaycan səhiyyəsinə böyük töhfə verəcəyini nəzərə çatdırıb.
Sonra çıxış edən səfir Ramin Həsənov bildirib ki, Almaniyadakı diasporumuzun sıralarında özünəməxsus yer tutan həkim soydaşlarımız yerli cəmiyyətə sıx şəkildə inteqrasiya edərək, Almaniyada xüsusi hörmət sahibinə çevriliblər. Köln şəhər meri ilə görüşü zamanı Azərbaycan diasporunun fəaliyyəti barədə xoş fikirlər eşitdiyini buna bariz nümunə kimi göstərən diplomat bu ictimai rəydən məmnunluq duyduğunu vurğulayıb. Azərbaycan Prezidenti İlham Əliyev əhalinin sağlamlığının qorunmasına böyük əhəmiyyət verir, bu baxımdan Almaniyadakı azərbaycanlı həkimlərin təcrübəsindən istifadə olunmasına çox böyük ehtiyac var. Gənc azərbaycanlı həkimlərin Almaniyada təhsil alması və təcrübə keçməsi iki ölkənin səhiyyə sistemi arasındakı əməkdaşlığa ciddi töhfədir.
Azərbaycan səhiyyə nazirinin müavini Nadir Zeynalov və ADDF icraçı direktoru Əkrəm Abdullayev də çıxışlarında Almaniyadakı azərbaycanlı həkimlərin fəaliyyətini və Azərbaycan diasporuna verdikləri töhfələri yüksək qiymətləndirdiklərini söyləyiblər.
Əmək və Əhalinin Sosial Müdafiəsi Nazirliyinin Reabilitasiya və istehsalatın təşkili departamentinin keyfiyyətə nəzarət şöbəsinin müdiri Bahadur Rzayev “Azərbaycanda əlilliyi olan şəxslər üçün reabilitasiya xidmətlərinin təşkili”, İcbari Tibbi Sığorta üzrə Dövlət Agentliyinin strateji təhlil departamentinin rəhbəri Araz Nəsirov “Azərbaycan səhiyyəsinin inkişafında icbari tibbi sığortanın rolu”, Oberstein xəstəxanasının kardiologiya klinikasının direktoru, professor Natiq Həsənov “Almaniyada Kardiologiyanın təşkili və müasir müalicə metodları”, Essen Universitet Klinikasının şöbə müdiri, professor Ramazan Cabbarlı “Beyin anevrizmaların müalicəsi” mövzularında məruzələrlə çıxış etdikdən sonra forumda Almaniyada çalışan elm adamlarının fəaliyyətini əks etdirən təqdimatlar olub və elmi nailiyyətlər ətrafında geniş fikir mübadiləsi aparılıb.