KONSTİTUSİYA GÜNÜ MÜNASIBƏTİLƏ KLASSİK MUSİQİ GECƏSİ KEÇİRİLMİŞDİR

12.11.2006 [21:30]
Çap et
A⁺ A^-

AZƏRTAC xəbər verir ki, noyabrın 12-də Konstitusiya günü münasibətilə Müslüm Maqomayev adına Azərbaycan Dövlət Filarmoniyasında “İRƏLİ” Ümumrespublika Gənclər Hərəkatı Mədəniyyət və Turizm Nazirliyi və “Azərbaycan Televiziya və Radio Verilişləri” QSC ilə birgə klassik musiqi gecəsi keçirmişdir.

Tədbirdə ümummilli lider Heydər Əliyevin 1995-ci il noyabrın 12-də qəbul olunmuş Azərbaycan Konstitusiyası ilə bağlı dediyi “Əminəm ki, Azərbaycanın ilk demokratik konstitusiyası xalqımızın demokratiya, milli dövlətçilik yolu ilə getməsini təmin edəcəkdir” sözləri səsləndirilmiş və Prezident İlham Əliyevin apardığı uğurlu siyasət diqqətə çatdırılmışdır.

Gecədə Dövlət xor kapellası, Dövlət rəqs ansamblı, əməkdar artis Aygün Bəylər, Bakı Musiqi Akademiyasının tələbəsi Amil Həsənoğlu, beynəlxalq müsabiqə laureatları Ayan Salahova, Züleyxa Bayramova, Əvəz Abdullayev və başqaları rəngarəng musiqi nömrələri ilə çıxış etmişlər.

Tədbirdə Milli Məclisin deputatları, Mədəniyyət və Turizm, Gənclər və İdman nazirliklərinin nümayəndələri iştirak etmişlər.