Könüllülər Xalça Muzeyinin işi ilə yaxından tanış olublar
Bakı, 5 dekabr, AZƏRTAC
Dekabrın 5-də Azərbaycan Xalça Muzeyində Beynəlxalq Könüllülər Günü münasibətilə “Muzey və könüllülər” adlı tədbir keçirilib.
AZƏRTAC xəbər verir ki, tədbirdə muzeyin direktoru, sənətşünaslıq üzrə fəlsəfə doktoru Şirin Məlikova çıxış edərək ölkəmizdə gənclərin könüllülük hərəkatında fəal iştirak etməsini yüksək qiymətləndirib. Bildirib ki, ötən il Azərbaycan Xalça Muzeyi bütün dünyada geniş yayılmış “Könüllülər hərəkatı”na qoşulub. Qeyd edib ki, könüllülərin əsas fəaliyyəti insanların muzeylərə marağının artırılması, muzey işində təcrübə, bacarıq və qabiliyyətlərinin inkişafına yönəldilir. Muzeyin bir çox ali təhsil ocaqları ilə əməkdaşlıq etdiyini deyən Şirin Məlikova əsası ulu öndər Heydər Əliyev tərəfindən qoyulan gənclər siyasətinin bu gün daha da qətiyyətlə davam etdirildiyini bildirib. “Ölkəmizdə gənclərin könüllülük hərəkatında fəal iştirak etməsi sevindirici haldır. Azərbaycanda keçirilən müxtəlif beynəlxalq və ölkə miqyaslı tədbirlərin təşkilində könüllülərin xüsusi rolu var. Azərbaycan Dövlət Mədəniyyət və İncəsənət Universiteti, Dillər Universiteti, Dövlət İqtisad Universiteti, Dövlət Rəssamlıq Akademiyası və Bakı Humanitar Kollecinin 40-a yaxın tələbəsi muzeyin könüllüləri sırasına qoşulub. Onlardan xüsusi aktivliyi və bacarığı ilə seçilən 6 nəfər muzeydə işlə təmin olunub”, - deyə Şirin Məlikova vurğulayıb. O, muzeyin ilk iş yeri kimi könüllülərin yaddaşlarında qalacağı və bir kadr kimi formalaşmalarında əhəmiyyətli rol oynayacağını qeyd edib.
Azərbaycan Dövlət Mədəniyyət və İncəsənət Universitetinin rəssamlıq fakültəsinin dekanı, sənətşünaslıq üzrə fəlsəfə doktoru Sevil Kərimova Azərbaycan Xalça Muzeyinin təmsil etdiyi ali məktəbin tələbələri üçün təcrübə və istehsalat bazası rolunu oynadığını bildirib.
Azərbaycan Dövlət Rəssamlıq Akademiyasının incəsənət tarixi kafedrasının müdiri, sənətşünaslıq üzrə elmlər doktoru, professor Sevil Sadıxova isə muzeyin “Uçan xalça” layihəsində iştirak edən tələbələrin uğurlu fəaliyyətindən söz açıb.
Diqqətə çatdırılıb ki, könüllülük dövründə gənclər muzeyin işi ilə yaxından tanış olaraq milli irsimizin qorunub saxlanılması və geniş kütləyə çatdırılmasında zəngin təcrübə toplayıblar.
“Asan könüllüləri” Gənclər Təşkilatı İctimai Birliyinin sədri Bəxtiyar İslamov Azərbaycanda könüllülük hərəkatının vüsət almasında dövlətin gənclərə qayğısı və bu sahəyə verdiyi önəmin nəticəsi olduğunu vurğulayıb.
Sonra könüllülərin muzeydə təcrübə keçdikləri dövrə həsr olunmuş videoçarx nümayiş olunub.
Tədbirin sonunda könüllü gənclərə sertifikatlar təqdim edilib.
Bölmənin digər xəbərləri
