MƏDƏNİYYƏT
KUKLA TEATRINDA YENİ MÖVSÜM AÇILMIŞDIR
Sentyabrın 13-də Abdulla Şaiq adına Kukla Teatrında yeni mövsümün açılışı olmuşdur. Açılış mərasimində mədəniyyət naziri Polad Bülbüloğlu çıxış edərək vurğulamışdır ki, Azərbaycan Prezidenti Heydər Əliyevin Fərmanına əsasən, sentyabrın 18-də ölkəmizdə Milli musiqi günü qeyd edilir. Azərbaycan klassik musiqisinin banisi, dahi bəstəkar Üzeyir Haçıbəyov məhz həmin gün anadan olmuşdur. Musiqi incəsənətin bütün sahələri ilə sıx bağlı olduğundan o, Kukla Teatrında da səslənəcək və bu gündən başlayaraq bütün teatr mövsümü boyu incəsənətin azyaşlı və yeniyetmə pərəstişkarlarına sevinc bəxş edəcəkdir.
Nazir demişdir ki, teatrın binası əsaslı təmir olunmuş, səhnədən tutmuş qrim otaqlarınadək hər yer səliqə-sahmana salınmışdır. İndi uşaqlarımız rahat salonda əyləşib tamaşalardan həzz ala biləcəklər.
Sonra əməkdar artistlər Ələkbər Hüseynov, Tatyana Şmelyova və başqa aktyorların iştirakı ilə qala-tamaşa göstərilmişdir. Teatrın ən mötəbər qonaqları isə, həmişəki kimi, uşaqlar idi.