Kürdəmir rayonunda həyətyanı sahədə baş vermiş yanğının bitişik evə keçməsinin qarşısı alınıb
Bakı, 27 may, AZƏRTAC
Fövqəladə Hallar Nazirliyinin (FHN) “112” qaynar telefon xəttinə Kürdəmir rayonunun Xırdapay kəndində yanğın baş verməsi barədə məlumat daxil olub.
FHN-in mətbuat xidmətindən AZƏRTAC-a bildirilib ki, məlumatla əlaqədar dərhal əraziyə FHN-in Dövlət Yanğından Mühafizə Xidmətinin Kürdəmir rayon Yanğından Mühafizə Hissəsinin qüvvələri cəlb olunublar.
Hadisə yerində əməliyyat şəraiti qiymətləndirilərkən yanğının vətəndaşa məxsus fərdi yaşayış evinin həyətyanı sahəsindəki köməkçi tikilidə baş verdiyi və hər an bitişik evə keçmə riskinin olduğu müəyyənləşdirilib.
Əməliyyat şəraitinə uyğun olaraq yanğınsöndürənlərin çevik müdaxiləsi sayəsində yanğın genişlənərək bitişik evə keçməsinə imkan verilmədən qısa müddətdə söndürülüb.
Hadisə nəticəsində ümumi sahəsi 60 kvadratmetr olan köməkçi tikili 30 kvadratmetr sahədə yanıb.
Tikilinin qalan hissəsi və bitişik ev yanğından mühafizə olunub.
Bölmənin digər xəbərləri
