Kürdəmirdə pambıq yığımına ciddi hazırlıq işləri görülür
Kürdəmir, 19 avqust, AZƏRTAC
Kürdəmir rayonunun pambıq tarlalarında artıq daban qozaları açılır və hazırda hər yerdə məhsul yığımına ciddi hazırlıq işləri görülür.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, cari mövsümdə 251,1 hektar sahədə “ağ qızıl” becərilib. Aqrotexniki qulluq işləri vaxtında və keyfiyyətlə aparıldığından tarlalarda bol məhsul yetişib. Hazırda 3-cü vegetasiya suyu başa çatdırılmaq üzrədir. Demək olar ki, bütün ərazilərdə, xüsusilə Şilyan, Qarasu, Muradxan, Şor-Şor, Cəyli və bir sıra digər ərazi icra nümayəndəliklərində hər hektardan 35 sentnerdən çox məhsul gözlənilir.
Qeyd edək ki, tarlaların məhsulunun 550 hektarı əl ilə, 2000 hektardan çoxu isə kombaynlarla toplanacaq. Əl ilə yığıma 500 nəfərdən artıq işçi qüvvəsi, habelə kifayət qədər texnika cəlb ediləcək.
Ötən mövsümdə 4701 ton məhsul tədarük olunan Kürdəmirdə cari ildə 5,5 min ton “ağ qızıl” istehsal ediləcəyi gözlənilir. Cari mövsümdə pambığın alış qiymətinin hər tona görə 50 manat artırılması fermerlərin bu sahəyə marağını daha da çoxaldıb.
Bölmənin digər xəbərləri
