Kutaisidə istehsal olunacaq elektromobillər “Orvo” adlanacaq
Tbilisi, 24 avqust, AZƏRTAC
Gürcüstan ilk dəfə istehsal edəcəyi elektromobillər “Orvo” adlanacaq. “Orvo” qədim Kolxidi dilindən tərcümədə “Səkkizlik” (sonsuzluq) deməkdir.
AZƏRTAC xəbər verir ki, bu barədə jurnalistlərə avtomobilin sənaye üzrə dizayneri Zviad Tsikoliya məlumat verib.
Onun sözlərinə görə, bu ideyanın müəllifi Gürcüstan Texniki Universitetinin professoru, İDS Beynəlxalq Dizayn Məktəbinin lektoru Qiqa Xatiaşvilidir.
Məlumat üçün qeyd edək ki, regionda ilk elektromobil zavodunun Gürcüstanın Kutaisi şəhərində tikilməsi ilə bağlı bu ölkənin “Igroup” və Çinin “Changan Automobile” konsorsiumu arasında memorandum imzalanıb.
Artıq gələn ildən elektromobillərin satışına başlanılacağı bildirilir. Zavodda istehsal olunacaq elektromobillərin 50 faizi daxili bazara yönəldiləcək, digər hissəsi isə Avropa İttifaqı ölkələrinə göndəriləcək. Zavodun illik istehsal gücü 40 min avtomobil təşkil edəcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
