Lənkəran-Astara bölgəsi çaylarında sululuğun artımı müşahidə olunmuşdur
Bakı, 4 aprel (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti aprelin 4-də çayların sululuğu ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, ölkə ərazisində yağan yağışın intensiv olması nəticəsində çaylarda, xüsusən də Lənkəran-Astara bölgəsi çaylarında sululuğun artımı müşahidə olunmuşdur.
Araşdırmanın nəticələrinə əsasən, Böyük Qafqazın Quba-Xaçmaz bölgəsi çaylarında sululuq ongünlük normanın 110-120, Kiçik Qafqazın çaylarında 20-60, Lənkəran-Astara bölgəsi çaylarında 80-100, Naxçıvan MR çaylarında isə 20 faizini təşkil etmişdir.
Kür çayının Qıraqkəsəmən məntəqəsində suyun səviyyəsinin 5 santimetr azaldığı qeydə alınmışdır. Qanıx çayının Əyriçay məntəqəsində isə suyun səviyyəsinin 2 santimetr artdığı müəyyən edilmişdir.
Kür çayının aşağı axınında suyun səviyyəsində mühüm dəyişiklik baş verməmişdir.
Hazırda suyun səviyyəsi Kür çayının aşağı axınındakı məntəqələrdə - Surrada 357, Şirvanda 205, Salyanda 125, Bankədə 207, Araz çayının Novruzlu məntəqəsində isə 45 santimetrdir.
Bölmənin digər xəbərləri
