CƏMİYYƏT
Lerikdə səhiyyə işçilərinin peşə bayramı qeyd edilmişdir
Lerik, 17 iyin (AZƏRTAC). İyunun 17-də Lerik şəhərindəki Heydər Əliyev Mərkəzində səhiyyə işçilərinin peşə bayramına həsr olunmuş toplantı keçirilmişdir.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad etmişlər.
Toplantıda çıxış edən rayon icra hakimiyyətinin başçısı Rövşən Bağırov tibb işçilərini peşə bayramı münasibətlə təbrik etmiş, ölkəmizdə səhiyyənin inkişafı, onun maddi-texniki bazasının möhkəmləndirilməsi və tibb işçilərinin sosial vəziyyətinin yaxşılaşdırılması sahəsində həyata keçirilən tədbirlərdən danışmışdır.
Rayon mərkəzi xəstəxanasının baş həkimi Mübariz Ağayev, Yeni Azərbaycan Partiyası Lerik rayon təşkilatının sədri Elxan Qənbərov və başqaları ölkəmizdə əhaliyə göstərilən tibbi xidmətin keyfiyyətinin artırılması istiqamətində böyük tədbirlərin həyata keçirildiyini vurğulayaraq səhiyyə işçilərinə göstərilən diqqət və qayğıya görə dövlətimizin başçısına minnətdarlıqlarını bildirmişlər.
Tədbirdə səhiyyə işçilərinin bir qrupuna rayon icra hakimiyyətinin fəxri fərmanları təqdim edilmişdir.