Levan Kobiaşvili yenidən Gürcüstan Futbol Federasiyanın prezidenti seçilib
Tbilisi, 15 fevral, AZƏRTAC
Gürcüstan Futbol Federasiyasının prezidenti vəzifəsinə seçkilər başa çatıb.
AZƏRTAC xəbər verir ki, federasiyanın 29-cu toplantısında bir sıra məsələlərə baxılıb, o cümlədən qurumun yeni rəhbəri seçilib.
Azərbaycan futbolsevərlərinin də yaxşı tanıdığı Levan Kobiaşvili yekdilliklə yenidən federasiyanın prezidenti seçilib.
L.Kobiaşvili növbəti dörd il müddətinə Federasiyaya rəhbərlik edəcək. O, ilk dəfə bu vəzifəyə 2015-ci ildə seçilib.
Toplantıda federasiyanın icraiyyə komitəsinin tərkibi də müəyyənləşib.
Qeyd edək ki, 1977-ci ildə anadan olan L.Kobiaşvili futbol karyerasına “Rustavi” komandasında başlayıb. O, sonradan Tbilisinin “Dinamo”, Vladiqafqazın “Alaniya”, Almaniyanın “Frayburq”, “Şalke” və “Herta BSC” komandalarında çıxış edib.
Bir müddət əvvəl Gürcüstanın futbol ictimaiyyətində onun Azərbaycana dəvət olunması barədə məlumat yayılmışdı. Amma L.Kobiaşvili belə bir təklif almadığını bildirib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
