Mart ayında aparılan qarölçmə işlərinin nəticələri açıqlanmışdır
Bakı, 7 aprel (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən ölkə ərazisində mart ayında aparılan qarölçmə işlərinin nəticələri açıqlanmışdır.
Nazirliyin mətbuat xidmətindən AZƏRTAC-a bildirmişlər ki, araşdırmanın nəticələrinə əsasən, fevral ayının ikinci ongünlüyünün ayrı-ayrı günlərində havanın maksimal temperaturunun dağlıq rayonlarda 12-15, bəzi dağətəyi rayonlarda 13-18 dərəcəyədək, mart ayında isə dağlıq rayonlarda 16-18, bəzi dağətəyi rayonlarda 19-21 dərəcəyədək yüksəlməsi müşahidə edilmişdir. Bu da qarın əriməsinə və qar örtüyünün azalmasına səbəb olmuşdur.
Böyük və Kiçik Qafqaz bölgələrinə yağan qar çoxillik normadan orta hesabla 37 faiz, keçən illə müqayisədə isə 54 faiz az olmuşdur. Belə ki, qar xəttinin aşağı sərhəddi 2013-cü ildə dəniz səviyyəsindən orta hesabla 1678 metr hündürlükdən keçirdisə, bu il 2179 metr hündürlükdən keçmişdir.
Bölmənin digər xəbərləri
