“Mədəniyyət.AZ” jurnalının xüsusi buraxılışının təqdimatı olub
Bakı, 24 dekabr, AZƏRTAC
Dekabrın 24-də Yasamal rayon Heydər Əliyev Mərkəzində “Mədəniyyət.AZ” jurnalının xüsusi buraxılışının təqdimatı olub.
AZƏRTAC xəbər verir ki, təqdimat mərasimində tanınmış mədəniyyət və incəsənət xadimləri, media təmsilçiləri və ictimaiyyət nümayəndələri iştirak ediblər.
Azərbaycan Mətbuat Şurasının sədri, Milli Məclisin deputatı Əflatun Amaşov Cümhuriyyət mövzusunun daim Azərbaycan elmi, mədəniyyəti, mətbuatı üçün avanqard olduğunu qeyd edib. Azərbaycan Xalq Cümhuriyyətinin tarixi haqqında məlumat verən Ə.Amaşov jurnalın növbəti nömrəsinin Cümhuriyyətə həsr edilməsini yüksək qiymətləndirib, yaradıcı kollektivə uğurlar arzulayıb.
Azərbaycan Yazıçılar Birliyinin katibi Rəşad Məcid çıxış edərək jurnalın əhəmiyyətindən danışıb. Qeyd edib ki, jurnalın budəfəki nömrəsi Azərbaycan Cümhuriyyətinin 100 illik yubileyinə həsr olunan xüsusi buraxılış şəklində dərc olunub. Məhz buna görə də jurnalda XX əsrin başlanğıcında regionda gedən proseslər, həmin zəmində ölkəmizin suverenliyi üçün tarixi şəraitin yetişməsi, ürəklərdə yaşayan azadlıq ideyalarının siyasi səhnəyə daşınması, Şərqdə ilk dəfə demokratik dövlət quruculuğu, onu yaradan şəxsiyyətlərin həyat və fəaliyyəti, bolşevik işğalından sonrakı aqibətləri və mühacirətdəki taleləri barədə sanballı, elmi-tədqiqat səpkili yazılara geniş yer verilib.
Əməkdar incəsənət xadimi, professor İlham Rəhimli nəşrin əhəmiyyətindən söz açıb, jurnalın bu nömrəsini kollektivin Azərbaycan Xalq Cümhuriyyətinin 100 yaşına bir töhfəsi, çoxsaylı cümhuriyyətsevərlərə bayram hədiyyəsi kimi səciyyələndirib.
Filologiya elmləri doktoru, professoru Asif Rüstəmli uzun illər sovet şovinizminin vətən xaini kimi damğaladığı azadlıq çarçılarının, müstəqilliyimizi dünyaya bəyan edən mütəfəkkir dövlət xadimlərimizin haqqında dərc olunan bu toplunu ən qiymətli töhfə kimi dəyərləndirib.
Türkiyənin ölkəmizdəki səfirliyinin Mədəniyyət və Tanıtma müşaviri İrfan Çiftçi tarixən dost və qardaş olan iki xalqın keşməkeşli tarixi dönəmlərdə bir-birinə arxa, dayaq olduğunu söyləyib. Öz ölkəsində vətən xaini kimi təqib olunan görkəmli ziyalıların ikinci Vətən olaraq Türkiyəni seçmələrinin heç də təsadüfi olmadığını vurğulayıb. Natiq bildirib ki, indi də Türkiyə arxivlərində əziz bir miras kimi Cümhuriyyətin və onun yaradıcılarının haqqında sanballı sənədlər mühafizə olunmaqdadır və öz tədqiqatçılarını gözləyir.
Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı uzun illər Cümhuriyyət tarixini araşdırıb, həqiqətlərin üzə çıxarılmasında böyük əmək sərf edən insanlar minnətdarlığını bildirib. Bildirib ki, “Mədəniyyət.AZ” jurnalının yaradıcı kollektivi bu xüsusi buraxılışı hazırlamaqla Azərbaycan gənclərinin milli vətənpərvərlik ruhunda tərbiyə edilməsinə, tariximizi daha dərindən öyrənməsinə çox böyük töhfə vermiş olub.
Tarixçi alim Nəsiman Yaqublu Cümhuriyyət qurucularının həyat yoluna işıq salan belə xüsusi buraxılışların çox olmasının vacibliyini vurğulayıb və nəşrin yaradıcı kollektivinə uğurlar arzulayıb.
Filologiya üzrə fəlsəfə doktoru Almaz Ülvi və tanınmış jurnalist Akif Cabbarlı böyük səriştə, incə zövqlə ərsəyə gətirilən bu toplunu tarixi bir salnamə adlandırıblar. Gələcək nəsillər üçün bir çox vacib faktların, arxiv materiallarının ustalıqla bir araya toplandığını vurğulayıblar. Hətta nadir şəkillərin, sənəd və teleqramların, xatirələrin çox böyük tarixi əhəmiyyəti olduğunu söyləyiblər.
Tədbirdə çıxış edən digər natiqlər Azərbaycan Xalq Cümhuriyyətinin tarixindən bəhs edib, nəşrin yaradıcı kollektivinə yeni nailiyyətlər arzulayıb, Cümhuriyyətə həsr etdikləri şeirləri oxuyublar.
“Mədəniyyət.AZ” jurnalında rənglərin bir-birini tamamlaması, mövzuların seçilərək bir-birini izləməsi, həmçinin tarixi faktların ardıcıllığı baxımdan ustalıqla, sahmanla yerində verilməsi xüsusi qeyd edilib.
Sonda Zöhrə Əliyeva təbrik üçün toplaşanlara səmimi təşəkkürlərini bildirib və bunu özünün vicdan borcu olaraq yerinə yetirdiyini söyləyib. Jurnalın bu buraxılışının müstəqilliyimizə, dövlətçiliyimizə vətəndaş sevgisi və keçmişimizə ehtiram əlaməti kimi dəyərləndirilməsini arzulayıb.
Məhəmməd Əmin Rəsulzadənin nəvəsi Rais Rəsulzadə jurnalın ərsəyə gəlməsində əməyi olan, başda Zöhrə Əliyeva olmaqla hər kəsə və tədbir iştirakçılarına minnətdarlığını bildirib.
Bölmənin digər xəbərləri
