Məhəmməd Balaqadaşov: Qalib Ordumuz Azərbaycan dövlətinin təhlükəsizliyini göz bəbəyi kimi qoruyur
Xaçmaz, 22 noyabr, Elxan Yusifli, AZƏRTAC
Ulu öndər Heydər Əliyevin çətin bir dövrdə ikinci dəfə hakimiyyətə gəlişi Azərbaycan xalqının təkidli tələbi ilə reallaşdı. Ölkə dağılmaq təhlükəsi, vətəndaş müharibəsi qarşısında idi. Belə çətin bir vəziyyətdən ölkəni ancaq Heydər Əliyev qurtara bilərdi. Ulu Öndər əvvəlcə ordu quruculuğuna diqqət yetirdi. Əslində Heydər Əliyev Azərbaycan Ordusunun əsasını hələ Cəmşid Naxçıvanski adına hərbi liseyin və Ali Hərbi Akademiyanın çətinliklə də olsa yaradılması ilə qoymuşdu. Mükəmməl ordu yaratmaq məqsədini qarşıya qoyan Ulu Öndərin rəhbərliyi ilə qısa müddətdə vahid komandanlıq tabeçiliyində ordu yaradıldı. Ölkə inkişaf etdikcə ordu quruculuğuna diqqət daha da artırıldı.
AZƏRTAC-ın bölgə müxbiri xəbər verir ki, bu fikirləri Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov söyləyib.
Təşkilatın sədri bildirib ki, Müzəffər Ali Baş Komandan İlham Əliyev tərəfindən ordu quruculuğu həmişə gündəmdə saxlanılıb. “Ordumuz gücləndi, müasir texnikalarla təmin edildi. Dünyanın ən inkişaf etmiş ordu sıralamasında ilk əlliliyə daxil oldu. Regionun qüdrətli ordusuna çevrilən rəşadətli Ordumuz 44 gün ərzində torpaqlarımızı işğaldan azad etdi, düşməni darmadağın edərək tarixi ədaləti bərpa etdi, xalqımızın qürurunu qaytardı. Bu gün qalib Ordumuz Azərbaycan dövlətinin təhlükəsizliyini göz bəbəyi kimi qoruyur. Dünya ölkələrinin hərbi ekspertləri Azərbaycan Ordusunun 44 günlük müharibədə göstərdiyi rəşadəti öyrənirlər. Ordumuz hərb tarixində yeni reallıq yaratdı”, - deyə Məhəmməd Balaqadaşov söyləyib.
O qeyd edib ki, Azərbaycan dövləti Qarabağın, Şərqi Zəngəzurun bərpası ilə əlaqədar Dövlət Proqramı qəbul edərək işğaldan azad olunmuş torpaqlarımızda ağıllı şəhər və kəndlərin salınması ilə həmin ərazilərin cənnətə çevrilməsi üçün gərgin fəaliyyət göstərilir. Böyük Qayıdışın əsası Ağalı kəndinə qayıdışla qoyuldu. Bu gün də tikinti-quruculuq işləri sürətlə davam etdirilir.
Qarabağda və Şərqi Zəngəzurda yol, işıq, qaz infrastrukturunun bərpası prosesi sürətlə davam edir. Qarabağ tikinti meydançasına çevrilib. Bütün bu işlər daxili imkanlar hesabına həyata keçirilir. Ən böyük çətinlik torpaqların minadan təmizlənməsidir. Xarici investorlar da Qarabağa, Şərqi Zəngəzura sərmayə qoyulmasına can atırlar. Bütün bu işlər Prezidentimiz İlham Əliyevin rəhbərliyi ilə uğurla həyata keçirilir.
“Ölkəmizin inkişafında Yeni Azərbaycan Partiyasının xüsusi rolunu da qeyd etmək istərdim. YAP-ın Proqramında ölkənin inkişaf strategiyası öz əksini tapıb. Partiyamızın Sədri İlham Əliyevin dediyi kimi, “Yeni Azərbaycan Partiyası bundan sonra da ölkəmizdə bütün proseslərin mərkəzində dayanacaq”. Əminik ki, Azərbaycan davamlı uğurları ilə bundan sonra da dünyanın diqqətində olacaq”, - deyə Məhəmməd Balaqadaşov bildirib.
Bölmənin digər xəbərləri
