MƏRKƏZİ SEÇKİ KOMİSSİYASI BEYNƏLXALQ MÜŞAHİDƏÇİLƏRİN QEYDİYYATINI DAVAM ETDİRİR
AZƏRTAC xəbər verir ki, Azərbaycanda prezident seçkilərini izləmək üçün beynəlxalq müşahidəçilərin qeydiyyatı davam edir.
Mərkəzi Seçki Komissiyası (MSK) bu günədək 55 müşahidəçini qeydə almışdır. Onlardan 41-i ATƏT-in Demokratik Təsisatlar və İnsan Hüquqları Bürosunu təmsil edir. Müstəqil Dövlətlər Birliyinin (MDB) 11, Avropa Şurası Parlament Assambleyasının 3 uzunmüddətli müşahidəçisi artıq fəaliyyətdədir. Uzunmüddətli müşahidəçilər şəhər və rayonlara ezam olunur, seçkiqabağı vəziyyəti, təbliğat-təşviqat proseslərini izləyirlər. Qısamüddətli beynəlxalq müşahidəçilərin kütləvi gəlişi isə yaxın günlərdə gözlənilir.
MSK-nın beynəlxalq əlaqələr şöbəsinin müdiri Rövzəq Qasımov bildirmişdir ki, seçki prosesini izləmək üçün Bakıdakı xarici ölkə səfirliklərindən də müraciətlər daxil olmaqdadır.
Ümumilikdə, prezident seçkilərini ATƏT-in 480, MDB-nin 250, Avropa Şurasının 30 uzunmüddətli və qısamüddətli müşahidəçisi izləyəcəkdir.
Bölmənin digər xəbərləri
