MESXET TÜRKLƏRİ DOĞMA VƏTƏNƏ QAYTARILMALIDIRLAR
AZƏRTAC-ın xüsusi müxbiri xəbər verir ki, Avropa Şurasının insan hüquqları üzrə komissarı Tomas Hammarberqin Gürcüstana beşgünlük səfəri başa çatmışdır. O, Gürcüstan rəhbərliyi, qeyri-hökumət təşkilatlarının nümayəndələri ilə görüşlər keçirmişdir.
Hammarberq səfərinin yekunlarına dair mətbuat konfransında Gürcüstanın Avropa Şurası qarşısında götürdüyü öhdəliklərə əməl etməsinin, mesxet türklərinin doğma yurdlarına qaytarılmasının vacibliyini vurğulamışdır. Avropa Şurasının komissarı xatırlatmışdır ki, Gürcüstan iqtidarı Stalin rejimi dövründə - ötən əsrin 40-cı illərində doğma yurdlarından sürgün olunmuş mesxet türklərinin Vətənə qaytarılacağını vəd etmişdir. Onlardan bəziləri Gürcüstana qayıtsa da, bu məsələyə dair proqramın icrasına hələ real surətdə başlanmamışdır.
Hammarberq qeyd etmişdir ki, hökumət müvafiq qanun layihəsi hazırlamış, lakin hələlik parlamentin təsdiqinə verməmişdir. Gürcüstan hökuməti qayıdanlarla yerli əhali, əsasən də ermənilər arasında müəyyən qarşıdurma yaranacağından ehtiyat edir və münaqişəyə yol verməmək üçün əhali arasında maarifləndirmə işləri aparmalıdır.
Xatırladaq ki, rəsmi məlumata görə, Gürcüstanın hazırda əsasən ermənilər məskunlaşan Samtsxe-Cavaxeti bölgəsindən 1944-cü ildə 92.280 nəfər mesxet türkü deportasiya edilmişdir.
Bölmənin digər xəbərləri
