Millətlər Liqasında 1/4 final və pley-off mərhələsinin püşkü atılıb
Bakı, 22 noyabr, AZƏRTAC
UEFA Millətlər Liqasında 1/4 final və pley-off mərhələsinin püşkü atılıb.
AZƏRTAC xəbər verir ki, İsveçrənin Nyon şəhərində keçirilən mərasimdə Türkiyə millisinin də rəqibi bəlli olub.
“Ay-ulduzlular” A Liqasına vəsiqə uğrunda görüşdə Macarıstan seçməsi ilə qarşılaşacaq. Matçlar 2025-ci il martın 20-23-də ev-səfər prinsipi ilə keçiriləcək.
Türkiyə millisi B Liqasının 4-cü qrupunu 2-ci, Macarıstan yığması isə A Divizionunun 3-cü qrupunu 3-cü pillədə başa vurub.
Digər pley-off matçlarında Ukrayna Belçikaya, Avstriya Serbiyaya, Yunanıstan Şotlandiyaya (A/B Liqası), Kosovo İslandiyaya, Bolqarıstan İrlandiyaya, Ermənistan Gürcüstana, Slovakiya Sloveniyaya (B/C Liqası), Cəbəllütariq Latviyaya, Malta isə Lüksemburqa (C/D Liqası) rəqib olub.
A Liqasında 1/4 final mərhələsində Niderland İspaniyanı, Xorvatiya Fransanı, Danimarka Portuqaliyanı, İtaliya isə Almaniyanı sınağa çəkəcək. İtaliya-Almaniya cütünün qalibi yarımfinalda Niderland-İspaniya matçının güclüsü ilə qarşılaşacaq. Yarımfinalın digər matçı isə Danimarka-Portuqaliya və Xorvatiya-Fransa duelinin qalibləri arasında reallaşacaq.
Qeyd edək ki, oyunlar gələn ilin mart ayında keçiriləcək.
Bölmənin digər xəbərləri
