Milli dəyərlər xalqların kimliyinin formalaşmasında müstəsna rola malikdir
Naxçıvan, 15 iyul, AZƏRTAC
Naxçıvan Muxtar Respublikası Mədəniyyət Nazirliyinin Mədəniyyət üzrə Elmi-Metodik Mərkəzinin və Culfa Rayon Mədəniyyət Şöbəsinin təşkilatçılığı ilə “Milli dəyərlərimiz milli varlığımızdır” mövzusunda onlayn dəyirmi masa keçirilib.
Nazirlikdən AZƏRTAC-ın Naxçıvan bürosuna bildirilib ki, “Milli adətlərimizi təbliğ etmək varlığımızın qarantıdır” mövzusunda çıxış edən mərkəzin direktoru Səyyar Məmmədov milli dəyərlərin xalqların kimliyinin formalaşmasında müstəsna rola malik olduğunu bildirib. Səyyar Məmmədov deyib: Tarixi təcrübə göstərir ki, öz soykökündən, tarixindən, milli dəyərlərindən uzaq düşən millətlər və dövlətlər müəyyən zaman kəsiyində yox olmaq, tarix səhnəsindən silinmək təhlükəsi ilə üzləşiblər. Bu mənada, milli adətlərimizi yaşatmaq millət olaraq gələcək varlığımızın vacib şərtlərindəndir.
Sonra Culfa Rayon Mədəniyyət Sarayının direktoru Aqil Adilzadə, Mədəniyyət üzrə Elmi-Metodik Mərkəzin metodisti Elçin Əsədov, Culfa Rayon Kırna kənd mədəniyyət evinin direktoru Sona Əsgərova müxtəlif mövzularda çıxış ediblər.
Bölmənin digər xəbərləri
