MİLLİ MƏCLİS İLƏ BMT-NİN İNKİŞAF PROQRAMI ARASINDA SAZİŞ İMZALANMIŞDIR
Avqustun 30-da Milli Məclisdə Azərbaycan hökuməti və BMT-nin İnkişaf Proqramı (BMTİP) tərəfindən hazırlanmış layihəyə dair sazişin imzalanması mərasimi olmuşdur. Sazişi Milli Məclisin sədri Murtuz Ələsgərov və BMTİP-in Azərbaycandakı rezident-əlaqələndiricisi Marko Borsotti imzalamışlar.
Murtuz Ələsgərov saziş imzalanmazdan əvvəl çıxış edərək dedi ki, “Ombudsmanın yaradılmasına və Azərbaycan parlamentinin potensialının artırılmasına yardım” layihəsi ölkəmizdə demokratiyanın inkişafı və insan hüquqlarının müdafiəsi baxımından böyük əhəmiyyətə malikdir. O xatırlatdı ki, ötən ilin dekabrında Milli Məclis ombudsman haqqında Konstitusiya qanununu ikinci oxunuşda təsdiqləmiş, cari ilin iyulunda isə Milli Məclisin sessiyasında Elmira Süleymanova ölkəmizin ilk ombudsmanı seçilmişdir.
Milli Məclisin sədri onu da bildirdi ki, layihə çərçivəsində ayrılmış 200 min dollar vəsait ombudsman strukturunun yaradılmasına böyük kömək göstərəcəkdir.
BMTİP-in rezident-əlaqələndiricisi Marko Borsotti dedi ki, bu layihənin yerinə yetirilməsi üçün Azərbaycan hökuməti də maliyyə vəsaiti ayırmışdır. O, əmin olduğunu bildirdi ki, BMTİP, Azərbaycan hökuməti və parlamenti arasında sıx əlaqələr cəmiyyətin daha da demokratikləşdirilməsinə təkan verəcəkdir.
Mərasimdə Milli Məclis sədrinin müavinləri Ziyafət Əsgərov və Gövhər Baxşəliyeva iştirak edirdilər.
Bölmənin digər xəbərləri
