MİLLİ MƏCLİSDƏ GÖRÜŞ
AZƏRTAC xəbər verir ki, mayın 8-də Milli Məclis sədrinin müavini, təbii ehtiyatlar, energetika və ekologiya məsələləri daimi komissiyasının sədri Valeh Ələsgərov ölkəmizdə səfərdə olan İndoneziya parlamentinin deputatları Lena Mariana və Ati Suqandi ilə görüşmüşdür.
Valeh Ələsgərov qonaqlara Milli Məclisin strukturu, parlamentin fəaliyyəti, beynəlxalq əlaqələri, ölkəmizdə həyata keçirilən iqtisadi islahatlar, neft strategiyası və digər məsələlər barədə ətraflı məlumat vermişdir. Azərbaycan ilə İndoneziya arasında münasibətlərin inkişafı üçün böyük potensialın mövcudluğunu və bu sahəyə parlamentlərin də mühüm töhfələr verə biləcəyini diqqətə çatdıran V.Ələsgərov münasibətlərimizin inkişafında parlamentlərarası dostluq qruplarının rolunu xüsusi qeyd etmiş, bu qrupların fəaliyyətinin gücləndirilməsinin və qarşılıqlı səfərlərin sayının artırılmasının vacibliyini vurğulamışdır.
Qonaqlar Azərbaycanın onlarda xoş təəssürat yaratdığını və burada gedən inkişafdan məmnun qaldıqlarını bildirmişlər.
Görüşdə Ermənistan-Azərbaycan, Dağlıq Qarabağ münaqişəsi, ölkəmizdə seçki sistemi və tərəfləri maraqlandıran digər məsələlər ətrafında fikir mübadiləsi aparılmışdır.
Bölmənin digər xəbərləri
