MİLLİ MƏCLİSDƏ QƏBULLAR
Avqustun 23-də Milli Məclisin sədri Murtuz Ələsgərov Rusiya Federasiyası Federasiya Şurasının üzvü Konstantin Markelov başda olmaqla MDB Parlamentlərarası Assambleyası müşahidəçilərinin nümayəndə heyətini qəbul etmişdir.
Parlamentin sədri Azərbaycana gəldiklərinə və qarşıdakı referendumun gedişini müşahidə edəcəklərinə görə qonaqlara təşəkkürünü bildirdi. Murtuz Ələsgərov müşahidəçiləri son 10 ildə Azərbaycanda gedən proseslər barədə məlumatlandırdı. O dedi ki, Əsas Qanun 1995-ci ildə qəbul olunmuşdur. Ötən illər ərzində respublikada dəyişikliklər baş vermiş, çoxlu qanun qəbul edilmiş, ölkəmiz çoxsaylı konvensiyalara qoşulmuş, Azərbaycan Avropa Şurasının üzvü olmuş və bu təşkilata qoşularkən öz üzərinə öhdəliklər götürmüşdür. Bütün bunlar Konstitusiyada müəyyən dəyişikliklər olunmasını zəruri edir və bu səbəbdən də Azərbaycan Prezidenti Heydər Əliyev ölkənin Əsas Qanununda dəyişikliklərə dair referendum keçirilməsi haqqında Fərman imzalamışdır. Təklif olunan dəyişikliklər ölkənin daha da demokratikləşməsinə və vətəndaşların hüquqlarının genişləndirilməsinə hakimiyyət orqanlarının formalaşdırılması sisteminin təkmilləşdirilməsinə, ictimai həyatın digər sahələrinin inkişafına yönəldilmişdir.
Konstantin Markelov səmimi qəbula görə təşəkkür edərək bildirdi ki, Bakıda olduqları günlərdə onlar Nazirlər Kabinetində, Mərkəzi Seçki Komissiyasında bir sıra görüşlər keçirmiş, ümumxalq səsverməsinə hazırlığın gedişi ilə tanış olmuşlar. Nümayəndə heyətinin başçısı dedi ki, MDB ölkələrində referendumlar seçkilərə nisbətən az keçirilir və onlar bu hadisəyə böyük maraq göstərirlər. Avqustun 24-də nümayəndə heyətinin üzvləri paytaxtda və ölkənin bəzi rayonlarında referendumun gedişini müşahidə edəcəklər.
X x x
Elə həmin gün Murtuz Ələsgərov Avropa Şurası Parlament Assambleyasından müşahidəçi, Ukrayna Ali Radasının deputatı Anatoli Raxanskini qəbul etmişdir.
Parlamentin sədri qonağı salamlayaraq bildirdi ki, ölkəmizin rəhbərliyi Azərbaycan-Ukrayna münasibətlərinin inkişafına və dərinləşməsinə böyük əhəmiyyət verir. Xalqlarımız arasında kökləri keçmişlərə gedib çıxan dostluq münasibətləri təşəkkül tapmışdır. Bu münasibətlər ölkələrimiz müstəqilliyə nail olduqdan sonra xüsusi əhəmiyyət daşıyır. Ölkələrimizin nümayəndə heyətləri beynəlxalq təşkilatlarda vahid mövqelərdən çıxış edirlər.
Murtuz Ələsgərov çıxarılmış məsələlər barədə qonağı məlumatlandıraraq dedi ki, son illər respublikamızın siyasi, ictimai, sosial-iqtisadi həyatında, hüquq və mədəniyyət sahəsində baş vermiş böyük dəyişikliklərin Konstitusiyada da öz əksini tapması zəruridir. Ölkəmizin Əsas Qanununa düzəlişlər və əlavələr demokratik, hüquqi, dünyəvi dövlət qurulmasına doğru daha bir addım atmağa imkan verir.
Anatoli Raxanski səmimi qəbula görə təşəkkürünü bildirərək dedi ki, referenduma hazırlığın gedişi barədə məlumat alması üçün Azərbaycanda ona hər cür şərait yaradılmışdır. Mərkəzi Seçki Komissiyasında və Azərbaycan Dövlət İqtisad Universitetində görüşlər zamanı o, referenduma çıxarılan bütün məsələləri ətraflı öyrənmişdir. O, həmçinin bildirdi ki, əhalinin referendum barədə öz rəyini internet vasitəsilə necə ifadə edə bilməsini ilk dəfə Bakıda gördü.
X x x
Sonra Milli Məclisin sədri Murtuz Ələsgərov Türkiyə Mərmərə Qrupunun Strateji və Sosial Araşdırmalar Vəqfinin sədri Akkan Suvər başda olmaqla Türkiyədən gəlmiş müşahidəçilərin nümayəndə heyətini qəbul etmişdir.
Parlamentin sədri qarşıdakı referendumdan danışaraq dedi ki, Azərbaycanda ümumxalq səsverməsi ikinci dəfə keçirilir. 1995-ci ildə bu yolla ölkənin Konstitusiyası qəbul olunmuşdur. Ötən yeddi ildə ölkənin keçdiyi inkişaf yolu, Azərbaycan bir çox beynəlxalq təşkilatlara daxil olması, bir sıra konvensiyalara qoşulması Əsas Qanununda dəyişikliklər aparılmasını tələb edir.
Cənab Akan Suvər vurğuladı ki, Azərbaycan müstəqillik qazandıqdan sonra hüquqi dövlət quruculuğunda böyük yol keçmiş və referenduma çıxarılmış məsələlər bu istiqamətdə daha bir addım olacaqdır.
Bölmənin digər xəbərləri
