MİLLİ MƏCLİSDƏ QƏBULLAR
Sentyabrın 3-də Milli Məclisin sədri Murtuz Ələsgərov İslam Aləmi Liqasının baş katibi Abdulla Əbdülmühsin Ət-Türki başda olmaqla bu təşkilatın nümayəndə heyətini qəbul etmişdir.
Murtuz Ələsgərov qonaqları səmimiyyətlə salamlayaraq, dedi ki, onların ölkəmizə səfərinin böyük əhəmiyyəti var. Çünki Azərbaycan islam dünyasının ayrılmaz tərkib hissəsidir, İslam Aləmi Liqası ilə münasibətlərin möhkəmləndirilməsi respublikamız üçün çox vacibdir.
Milli Məclisin sədri vurğuladı ki, Səudiyyə Ərəbistanında 40 il əvvəl yaradılmış və qeyri-hökumət təşkilatı kimi fəaliyyət göstərən İslam Aləmi Liqasının Afrika, Amerika, Avropa və MDB ölkələrində əlaqələndirmə şuraları var. Bütün dünyada şöhrət qazanmış Liqa BMT, İslam Konfransı Təşkilatı kimi beynəlxalq qurumlarla uğurla əməkdaşlıq edir. Təşkilatın başlıca məqsədi isə çətin vəziyyətə düşən islam ölkələrinə yardım göstərməkdir. Onun rəhbərləri Azərbaycanın problemlərinə də böyük diqqət yetirir və öz yardımını təklif edir. Bundan əlavə, Liqanın cari ilin aprelində Məkkədə keçirilmiş iclasında işğalçı erməni qüvvələrinin Azərbaycan ərazilərindən çıxmasını tələb edən qətnamə qəbul olunmuşdur.
Murtuz Ələsgərov qonaqlara Azərbaycan cəmiyyətində iqtisadi inkişaf və demokratikləşmə prosesi, Ermənistan-Azərbaycan, Dağlıq Qarabağ münaqişəsinin danışıqlar yolu ilə aradan qaldırlması sahəsində ölkəmizin rəhbərliyi tərəfindən göstərilən səylər barədə ətraflı məlumat verdi.
Abdulla Əbdülmühsin Ət-Türki Azərbaycanın islam dünyasının mühüm hissəsi olması fikri ilə razılaşaraq dedi ki, İslam Aləmi Liqası ölkəmizlə münasibətlərin genişləndirilməsinə böyük əhəmiyyət verir. O, Bakıdakı görüşlərindən də danışaraq, bunların tam qarşılıqlı anlaşma şəraitində keçdiyini bildirdi.
Nümayəndə heyətinin başçısı nəzərə çarpdırdı ki, İslam Aləmi Liqası və onun müxtəlif dövlətlərdə fəaliyyət göstərən strukturları bütün islam ölkələrinə yardım göstərir. Qonaq dedi: Biz əməkdaşlığın genişləndirilməsi barədə Azərbaycanın təklifini böyük məmnuniyyətlə qəbul edərik və ölkənizə hər cür yardım göstərməyə hazırıq.
Görüşdə qarşılıqlı maraq doğuran bir sıra məsələlər də müzakirə olundu.
Dini Qurumlarla İş üzrə Dövlət Komitəsinin sədri Rafiq Əliyev, Azərbaycanın Səudiyyə Ərəbistanındakı səfiri Elman Araslı, Səudiyyə Ərəbistanının Bakıdakı səfiri Əli Həsən Cəfər görüşdə iştirak edirdilər.
X x x
X X X
Elə həmin gün Milli Məclisin sədri Murtuz Ələsgərov Yaponiyanın ölkəmizdəki fövqəladə və səlahiyyətli səfiri Toşiyuki Fucivaranı qəbul etmişdir.
Murtuz Ələsgərov diplomatın Azərbaycan tarixinə böyük maraq göstərməsindən məmnunluq duyduğunu bildirdi. Milli Məclisin sədri Azərbaycan-Yaponiya münasibətlərinin ildən-ilə inkişaf etdiyindən danışaraq, belə bir faktı xüsusi vurğuladı ki, Gündoğan ölkə özünün Cənubi Qafqazda ilk səfirliyini Azərbaycanda açmışdır. Azərbaycan Prezidenti Heydər Əliyevin 1998-ci ildə Yaponiyaya rəsmi səfərindən sonra ölkələrimiz arasında siyasi, iqtisadi və mədəni əlaqələr daha sürətlə inkişaf etməyə başlamışdır. Dövlətimizin başçısının səfər zamanı keçirdiyi görüşlər və imzalanmış sənədlər qarşılıqlı surətdə faydalı münasibətlərin inkişafına yeni təkan vermişdir. Parlamentin sədri xatırlatdı ki, Heydər Əliyev hələ 25 il bundan əvvəl Azərbaycanın rəhbəri olarkən Yaponiya hökuməti ilə əməkdaşlıq şəraitində Bakı məişət kondisionerləri zavodunu tikdirmişdi. İndi isə Yaponiyanın məşhur şirkətləri Azərbaycanın neft sənayesinə, Şimal DRES-in yenidən qurulmasına, Sumqayıt müəssisələrinin bərpasına sərmayə qoyurlar. Bundan əlavə, Yaponiyanın maliyyə strukturları Azərbaycan iqtisadiyyatının müxtəlif sahələrinin inkişafı üçün qrantlar ayırırlar. Ölkələrimizin hökumətləri Böyük İpək yolu layihəsi çərçivəsində də uğurla əməkdaşlıq edirlər.
Milli Məclisin sədri parlamentlərarası əlaqələrdən də ətraflı danışaraq, iki ölkələrimizin qanunvericilik orqanları nümayəndələrinin beynəlxalq təşkilatlarda fəal əlaqələrini vurğuladı. O bildirdi ki, Milli Məclisdə Azərbaycan-Yaponiya parlament dostluq qrupu fəaliyyət göstərir.
Parlamentin sədri bildirdi ki, Yaponiyanın qanunvericilik orqanının başçısını rəsmi səfərə Azərbaycana dəvət etməsi barədə bu ölkənin parlamentinə rəsmi məktub göndərəcəkdir.
Sonra Murtuz Ələsgərov Azərbaycan rəhbərliyinin Ermənistan-Azərbaycan, Dağlıq Qarabağ münaqişəsinin nizama salınması üçün göstərdiyi səylər barədə səfirə ətraflı məlumat verdi. O, ölkəmizin ədalətli mövqeyini daim dəstəklədiyinə görə Yaponiya hökumətinə təşəkkürünü bildirdi.
Toşiyuki Fucivara Azərbaycan-Yaponiya münasibətlərinin yüksək səviyyədə olması fikri ilə razılaşaraq dedi ki, Azərbaycan Prezidenti Heydər Əliyevin Yaponiyaya səfəri ikitərəfli əlaqələrin genişlənməsində mühüm rol oynamışdır. O bildirdi ki, ölkəmizdə işlədiyi dövrdə Azərbaycan və Yaponiya parlamentləri arasında əlaqələrin inkişafına kömək edəcəkdir.
Səfir qarşılıqlı səfərlərin və görüşlərin mühüm əhəmiyyətini vurğulayaraq dedi ki, Yaponiyanın nəqliyyat naziri yaxın günlərdə Azərbaycana gələcəkdir. Diplomat bildirdi ki, Bakıya rəsmi səfərə dəvət haqqında Murtuz Ələsgərovun məktubunu Yaponiya parlamentinin sədrinə böyük məmnuniyyətlə çatdıracaqdır.
Bölmənin digər xəbərləri
