MİLLİ MƏCLİSİN ETİRAZ MƏKTUBU QUBERNATORLUQUNDA MÜZAKİRƏ EDİLMİŞDİR
Xəbər verdiyimiz kimi, Gürcüstanın Qardabani rayonundakı Candar kəndində və rayon mərkəzində soydaşlarımıza qarşı cinayətlər törədilmiş, bunun nəticəsində onlardan bir neçəsi ağır bədən xəsarəti almışdı. Bu kriminal hadisələr təkcə Gürcüstanda yaşayan azərbaycanlıların deyil, respublikamızın ictimaiyyətinində ciddi narahatlığına səbəb olmuşdur. Bununla əlaqədar Milli Məclis Gürcüstan parlamentinə etiraz məktubu göndərmişdir.
Gürcüstan parlamenti həmin məktubu müzakirə üçün Kvemo Kartli - Borçalı bölgəsinin qubernatorluğuna göndərmişdir. Bu günlərdə məktub burada Qardabani rayon rəhbərliyinin, ölkə parlamentinin bu bölgədən seçilmiş deputatlarının, habelə bölgənin hüquq-mühafizə orqanlarının və soydaşlarımızın nümayəndələrinin iştirakı ilə keçirilən toplantıda ciddi müzakirə olunmuşdur.
Bölgənin qubernatoru Levan Mamaladze çıxış edərək, Azərbaycan parlamentinin məktubu barədə ətraflı məlumat vermiş, bu etirazın tam əsaslı olduğunu vurğulamışdır. O, təkcə Qardabani rayonunda deyil, ümumən Borçalı bölgəsində azərbaycanlılara qarşı bu cür cinayətlər törədilməsinə görə ən əvvəl hüquq-mühafizə orqanlarını təqsirləndirmiş və onlardan qəti tədbirlər görməyi tələb etmişdir.
Gürcüstan parlamentinin deputatları Məmməd Məmmədov və Levan Caparidze isə bildirmişlər ki, azərbaycanlılara qarşı cinayətlərdən məqsəd dostluğu ilə çox ölkələrə nümunə olan Gürcüstanla Azərbaycanın arasını vurmaqdır. Polisin bu hadisələrə laqeyd münasibəti və dərhal tədbirlər görməməsi isə bağışlanılmaz haldır.
AZƏRTAC-ın müxbiri Gürcüstan parlamentinin sədri Nino Burcanadzedən Milli Məclisin məktubu, habelə Qardabanidəki hadisə barədə fikrini açıqlamağı xahiş etmişdir. Azərbaycan parlamentindən belə məktub gəlməsindən təəssüfləndiyini vurğulayan xanım Burcanadze Qardabanidə baş vermiş hadisədən və cinayətkarların indiyədək tutulmamasından xəbərdar olduğunu söyləyərək demişdir ki, belə hadisələr ölkənin başqa bölgələrində də olur. Gürcüstanla Azərbaycan arasındakı səmimi münasibətlər və səmərəli iqtisadi əlaqələr ölkələrimizin rifahını istəməyən bəzi qara qüvvələrin ürəyincə deyil və buna görə də hər vasitə ilə, o cümlədən də azərbaycanlılara qarşı cinayət etməklə aramızı vurmağa can atırlar. Lakin bu, Qardabani hadisələrinə göz yummağa əsla əsas vermir. Yerli polis cinayətkarları dərhal axtarıb tapmalı idi amma belə olmadı. Elə bunun özü də cinayətkarlıqdır. Ona görə də parlament Daxili İşlər Nazirliyinə məktub göndərərək, cinayətkarların aşkara çıxarılması və cəzalandırılması üçün təcili tədbirlər görülməsini qəti şəkildə tələb etmişdir. Bundan sonra biz Milli Məclisin məktubunu parlamentin iclaslarından birinin müzarisinə çıxararaq öz mövqeyimizi bildirəcək və Azərbaycanın ali qanunvericilik orqanına cavab göndərəcəyik.
Şahismayıl Məmmədov
AZƏRTAC-ın xüsusi müxbiri
Qardabani-Tbilisi
Bölmənin digər xəbərləri
