Son zamanlar respublikamızda radikal müxalifəti təmsil edən bəzi mətbuat orqanlarında PKK terrorçu təşkilatının fəaliyyəti və guya ölkə rəhbərliyinin bu təşkilatı dəstəkləməsi haqqında geniş şəkildə məqsədyönlü kampaniya aparılır. Bu kampaniyanın əsas məqsədi dövlət rəhbəri kimi Azərbaycan Prezidenti Heydər Əliyevin xalqımız və dövlətçiliyimiz naminə xidmətləri sayəsində illərlə qazandığı sağlam imicinə zərbə vurmaq, 2003-cü seçki ilində onun geniş sosial bazasını zəiflətmək, beynəlxalq aləmin, xüsusən qardaş Türkiyənin rəsmi dairələrində, geniş ictimaiyyətində ölkəmizin başçısına mənfi münasibət formalaşdırmaqdan ibarətdir. 

Radikal müxalifəti təmsil edən Müsavat, ADP rəhbərləri, xaricdə gizlənmiş A.Mütəllibovun bəzi tərəfdarları və digər siyasi partiya rəsmiləri heç bir məsuliyyət hiss etmədən, qəsdən müxtəlif səpkili bəyanatlar verərək, həm ictimaiyyəti çaşdırmağa cəhd göstərir, həm də ölkəmizin beynəlxalq imicinə, xarici dövlətlərlə münasibətlərinə ciddi xələl gətirirlər. Təəssüflər olsun ki, onların bu bəyanatları və mülahizələri bəzi mətbuat orqanları tərəfindən geniş işıqlandırılır, dəqiqləşdirilmədən geninə-boluna yayılır. Bununla da, Heydər Əliyevin ciddi səyi və həyata keçirdiyi mühüm tədbirlər nəticəsində dünyada antiterror koalisiyasının fəal üzvü kimi tanınmış Azərbaycan, siyasi ambisiyasına hər şeyi qurban verməyə hazır olan bir neçə radikal partiya rəhbərinin və onlara xidmət edən bəzi mətbuat orqanlarının səyi ilə terroru dəstəkləyən ölkə kimi təbliğ olunur. Bu, əsl antidövlət və antixalq fəaliyyətidir ki, MTN buna biganə qala bilməz.

Son günlər əllərinə xüsusi fürsət düşübmüş kimi, bu şəxslər elə bil Azərbaycanın beynəlxalq nüfuzuna daha güclü zərbə vurmaq yarışına çıxıblar. Xüsusən Türkiyənin Ədalət və İnkişaf Partiyasının başçısı Rəcəb Tayyib Ərdoğanın Bakıya səfəri zamanı Milli Məclisin sədri Murtuz Ələsgərov ilə görüşdə işlətdiyi bir neçə sözü bayraq edərək, bu şəxslər ölkəmizə və xalqımıza nə qədər zərbə vurduqlarının fərqinə varmadan məsuliyyətsiz bəyanatlar yayırlar. Bu işdə onlar hətta torpaqlarımızı işğal etmiş düşmən təbliğatından, beynəlxalq erməni lobbisinin dezinformasiya xidmətindən də çəkinmədən istifadə edirlər. Məqsəd budur: nə qədər Azərbaycana pis olsa, onun iqtidarına da pis olacaq, deməli, müvafiq olaraq müxalifətə yaxşı olacaq.

Milli təhlükəsizlik naziri kimi mən belə məsuliyyətsiz bəyanat və yazı sahiblərini bir daha öz əməllərinə qiymət verməyə və rəsmi məsuliyyətə dəvət edirəm. Azərbaycanda yaşayan kürd əsilli vətəndaşların hamısının və yaxud bir qisminin heç bir əsas olmadan terrorçu olmasını iddia etmək, onları PKK ilə eyniləşdirmək, respublikada milli etimadsızlıq yaratmaq, milli ədavəti qızışdırmaq həm cinayətdir, həm də Azərbaycanın düşmənlərinin birbaşa xidmətində durmaqdır.

Yaxud xarici iş adamlarını, xüsusən dost Türkiyədən ölkəmizə gəlmiş sərmayəçiləri, digər vətəndaşları milli mənsubiyyətinə, yaxud da hansısa şəxsi, subyektiv mülahizələrə görə PKK-çı kimi qələmə verməyə heç kimin haqqı yoxdur. Bu, həm Azərbaycanın demokratik qanunlarına, dövlət maraqlarına daban-dabana ziddir, həm də xarici sahibkarların ölkə iqtisadiyyatına sərbəst yatırımlarına ciddi maneə törədə bilər. Digər tərəfdən,Azərbaycan dünyaya inteqrasiya olunmuş azad, demokratik və açıq bir dövlətdir. Heç bir daxili və beynəlxalq qanun, konvensiya heç kəsə hüquq vermir ki, ölkəyə gələn xarici vətəndaşların milli mənsubiyyətini araşdırsın, milli mənsubiyyətindən asılı olaraq, onun fəaliyyətinə münasibət bildirsin. İstər ölkə vətəndaşına, istərsə də əcnəbilərə münasibət yalnız Azərbaycanın qanunlarına, götürdüyü beynəlxalq öhdəliklərə uyğun olaraq müəyyənləşir.

O ki qaldı hörmətli R.T.Ərdoğanın ifadələrinə, az-çox savadı və təhlil qabiliyyəti olan hər bir şəxs dərhal anlayır ki, bu ifadələrlə o, Azərbaycanda PKK-nın fəaliyyət göstərməsini nəinki təsdiqləmir, heç buna işarə belə etmir. Əvvəla, R.T.Ərdoğan öz çıxışında Türkiyə ilə çiyin-çiyinə terrorçuluğa, o cümlədən PKK-ya qarşı mübarizə apardığına görə Azərbaycan rəhbərliyinə öz xüsusi təşəkkürünü bildirir. Digər tərəfdən, son illər Türkiyədə xüsusi zərbə alan PKK-nın bütün dünyada, Avropada, MDB məkanında, Qafqazda, o cümlədən Azərbaycanda gizli fəaliyyət qurmaq cəhdlərini, ayrı-ayrı ad altında çalışması ehtimalını qardaş ölkənin rəsmi dairələrinə çatdırır. Burada təəccüblü nə var? Türkiyənin hörmətli səfiri Ə.Ü.Çeviközün iki gün sonra müxalifətin PKK şousuna və Azərbaycan-Türkiyə münasibətlərini açıq-aşkar korlamaq cəhdlərinə cavab olaraq, televiziya və mətbuatda verdiyi açıqlama və izahatı dinləyərkən, ölkəmizi PKK-nı dəstəkləməkdə günahlandıran bəzi müxalifətin nə qədər miskin olduğunu görməmək mümkün deyil.

Dövlət başçısını, hansısa dövlət rəsmisini qəbul etməmək, ona qarşı istənilən vasitələrlə mübarizə aparmaq, hətta etik normaları belə aşmaq qeyri-qanuni olsa da, indiki Azərbaycan şəraitində müəyyən qədər başa düşülə bilər. Amma vətəndaşı olduğu ölkənin, nümayəndəsi olduğu xalqın milli marağına və imicinə bu qədər ağır zərbə vurmağı ancaq vətəndaş məsuliyyətini itirmiş adamlar edə bilər.

11 sentyabrdan sonra öz qətiyyətli mövqeyi və tədbirləri ilə Azərbaycanı dünyada terror əleyhinə mübarizə aparan lider ölkələr sırasına çıxarmış Heydər Əliyevi ləkələmək xatirinə bu gün müxalifətin apardığı kampaniya və PKK şousu ermənilər və onlara dəstək verən qüvvələr üçün göydəndüşmə bir xidmətdir. Bütün dünya ermənilərinin Ermənistanı terroru dəstəkləyən ölkələr siyahısından çıxarmağa və həmin siyahıya Azəbaycanı daxil etməyə çalışdığı bir vaxtda bizim müxalifətin bu fəaliyyətinə nə ad vermək olar?

Onsuz da erməni lobbisinin güclü təsiri ilə beynəlxalq aləmdə ayrı-ayrı səviyyələrdə həyata keçirilən müxtəlif standartlı yanaşmalar, dini ayrı-seçkilik Azərbaycanın milli və dövlət maraqlarının reallaşması yolunda ciddi maneələr yaradır. Azərbaycanın ədalətli mövqeyi və hüquqları bu qeyri-standart yanaşmaya görə çox çətinliklə dəstəklənir. Belə bir vəziyyətdə ölkəmizin ABŞ, Türkiyə və antiterror koalisiyasının üzvü olan digər dövlətlərlə münasibətlərini qəsdən korlamağa xidmət edən insanlar, erməni dəyirmanına su axıdan partiyalar, mətbuat orqanları təkcə qanundan deyil, həm də vətəndaş qınağından, ictimai nifrətdən çəkinməlidirlər.

Milli Təhlükəsizlik Nazirliyinin bütün şəxsi heyəti və şəxsən öz adımdan birmənalı bəyan edirəm ki, Azərbaycanda PKK bir təşkilat kimi olmayıb, yoxdur və bundan sonra da olmayacaq. Bununla bağlı biz hələ keçən il bəzi müxalifət mətbuatında PKK şousu aparılarkən bəyanat vermişdik. Əlbəttə, PKK bütün dünyaya yayılmış terrorçu bir təşkilat kimi Azərbaycanda da fəaliyyət göstərməyə cəhd edə bilər. Bütün dünya ölkələrində, Azərbaycanda, elə Türkiyənin özündə də PKK-ya rəğbəti olan, ona yardım göstərməyə çalışan, yaxud göstərən insanlar mövcud ola bilər. Bütün bu hallar hüquq-mühafizə orqanlarının əməliyyat nəzarətindədir və tənzimlənir. Təşkilat kimi fəaliyyət göstərmək üçün onun müvafiq təşkilati strukturları, gizli və ya açıq təbliğat vasitələri və s. zəruri mexanizmləri olmalıdır. Azərbaycanda bunların heç biri yoxdur. Odur ki, PKK şousu respublikamızda kənardan, süni surətdə qızışdırılan, qəsdən gündəlikdə saxlanılan və müəyyən qeyri-sağlam məqsədlər üçün aparılan bir kampaniyadır.

Azərbaycan Prezidenti Heydər Əliyev dəfələrlə bəyan edib ki, biz hər zaman bütün terrorçu təşkilatlarla, o cümlədən qardaş Türkiyənin ərazi bütövlüyünə qarşı çıxış edən PKK ilə mübarizə aparmışıq, aparırıq və aparacağıq. MTN ölkə başçısının bu mövqeyini öz fəaliyyətində əsas götürərək istənilən terrorçu qurumun, o cümlədən PKK-nın hər hansı bir formada ölkəmizdə fəaliyyət göstərməsinə, dost və qardaş Türkiyəyə qarşı mübarizədə Azərbaycan ərazisindən istifadə etməsinə imkan verməyəcəkdir. Eyni zamanda, MTN heç bir şəxsə, quruma, siyasi partiya və mətbuat orqanına imkan verə bilməz ki, öz məsuliyyətsiz çıxışları, bəyanatları və böhtanları ilə Azərbaycanı beynəlxalq aləmdə terroru dəstəkləyən ölkə kimi təqdim etsin. Təəssüflər olsun ki, Müsavat, ADP və digər partiya rəhbərləri və onlara məxsus bəzi mətbuat orqanları bu gün məhz belə fəaliyyətlə məşğul olurlar. Odur ki, MTN onların bugünkü fəaliyyətini yalnız antiazərbaycan fəaliyyəti kimi qiymətləndirir və buna qarşı qanunun bütün imkanlarından istifadə edərək mübarizə aparacağını bəyan edir.

Bir faktı da xüsusi vurğulamağı özümə borc bilirəm. 1993-cü ilin iyun ayından başlayaraq, Azərbaycanda həyata keçirilən daxili və xarici siyasət, ölkəmizin Prezidenti Heydər Əliyevin fəaliyyəti, müstəqil dövlət quruculuğu prosesində reallaşdırdığı böyük işlər, respublikamızın beynəlxalq aləmə çıxarılması və özünə layiq yer tutması ilə bağlı atdığı addımlar Azərbaycan xalqının milli maraqlarına tam cavab verir və onun inkişafına xidmət edir. Bu işlər bu gün də davam edir və hansısa siyasi ambisiyalarını, şəxsi maraqlarını güdən məsuliyyətsiz insanlar, yaxud qurumlar tərəfindən bu böyük işlərə xələl gətirilməsi cəhdlərinin qarşısı bundan sonra da qətiyyətlə alınacaqdır.

Namiq Abbasov

Azərbaycan Respublikasının

milli təhlükəsizlik naziri