MİLLİ TƏHLÜKƏSİZLİK NAZİRLİYİ MƏTBUAT XİDMƏTİNİN MƏLUMATI
Xəbər verildiyi kimi, bu il sentyabr ayının 4-dən 8-dək Azərbaycan Respublikasının milli təhlükəsizlik naziri, general-leytenant Namiq Abbasovun başçılıq etdiyi nümayəndə heyəti İran İslam Respublikasının təhlükəsizlik və informasiya naziri Əli Yunisinin dəvəti ilə Tehranda işgüzar səfərdə olmuşdur.
İranın Təhlükəsizlik və İnformasiya Nazirliyində keçirilmiş görüşlərdə indiyədək iki ölkənin xüsusi xidmət orqanları arasında əlaqələrin olmaması qeyri-normal hal kimi qiymətləndirilmiş, Azərbaycan Respublikası ilə İran İslam Respublikasının siyasi və iqtisadi həyatının bütün sahələrində münasibətlərin yaradılması və genişləndirilməsində əsas əngəllərdən olan qarşılıqlı xof və inamsızlığın aradan qaldırılmasında iki xidmətin vaxtaşırı anlaşmasının və birgə fəaliyyətinin zəruriliyi qeyd edilmişdir. Görüş zamanı beynəlxalq terrorizmə, narkobiznesə, qaçaqmalçılığa, qeyri-qanuni miqrasiyaya və digər transmilli cinayətlərə qarşı mübarizədə səylərin birləşdirilməsi barədə razılıq əldə olunmuşdur.
Səfər zamanı nümayəndə heyəti İranın Ali Təhlükəsizlik Şurasının katibi Həsən Ruhani ilə görüşmüşdür. Nazir Namiq Abbasov cənab Ruhaninin Bakıya işgüzar səfəri zamanı hər iki ölkə arasında təhlükəsizlik məsələləri üzrə münasibətlərin yaradılması və genişləndirilməsi istiqamətində qarşılıqlı təşəbbüsün əhəmiyyətini vurğulamış, İrana səfərinin məhz bu razılaşma əsasında gerçəkləşdiyini qeyd etmişdir.
Həsən Ruhani hər iki ölkənin məsul şəxsləri arasında müntəzəm görüşlərin zəruriliyindən danışmış, dövlətlərarası münasibətlərə xələl gətirən əməllərin qarşısının alınmasının vacibliyini vurğulamış, səfərin mövcud əlaqələrin daha da genişləndirilməsi və dərinləşdirilməsində müsbət rol oynayacağına inamını ifadə etmişdir.
Sentyabrın 5-də İran İslam Respublikasının Prezidenti Seyid Məhəmməd Xatəmi Azərbaycan nümayəndə heyətini qəbul etmişdir. Səmimi şəraitdə keçən görüş zamanı nazir Namiq Abbasov Azərbaycan Respublikasının Prezidenti Heydər Əliyevin salamını və xoş arzularını İranın dövlət başçısına çatdırmış, yenidən prezident seçilməsi münasibətilə onu təbrik etmiş, İran xalqının bu seçiminin Azərbaycanda da böyük məmnunluq hissi ilə qarşılandığını vurğulamışdır.
Nazir Namiq Abbasov tarix, din və mədəniyyət baxımından yaxın olan xalqlarımız arasında mehriban qonşuluq və dostluq münasibətlərinin inkişaf etdirilməsinin Azərbaycanın dövlət maraqlarına cavab verdiyini, qarşılıqlı inamın yaradılması istiqamətində iranlı həmkarı Əli Yunisi ilə faydalı söhbətlər aparıldığını qeyd etmişdir.
Cənab Xatəmi Azərbaycan Prezidenti Heydər Əliyevin İrana gözlənilən səfərinin nəticələrinin ölkələrimiz və xalqlarımız arasında əlaqələrin genişlənməsinə təkan verəcəyinə əmin olduğunu bildirimişdir.
Qarşılıqlı anlaşma və işgüzarlıq şəraitində keçən görüşlər zamanı Azərbaycanın milli təhlükəsizlik naziri Namiq Abbasov İran İslam Respublikasının təhlükəsizlik və informasiya naziri Əli Yunisini və daxili İşlər naziri Əbdülvahid Musəvi-Larini Bakıya işgüzar səfərə dəvət etmişdir. Hər iki dəvət məmnuniyyətlə qəbul olunmuşdur.
Bölmənin digər xəbərləri
