MİLLİ TƏHLÜKƏSİZLİK NAZİRLİYİ MƏTBUAT XİDMƏTİNİN MƏLUMATI
2001-ci il sentyabr ayının 9-11-də Qırğızıstan Respublikasının Çolpon-Ata şəhərində türkdilli dövlətlərin xüsusi xidmət orqanlarının IV konfransı keçirilmişdir. Azərbaycan Respublikası Milli Təhlükəsizlik Naziri, general-leytenant Namiq Abbasovun başçılıq etdiyi nümayəndə heyəti konfransın işində iştirak etmişdir.
Tədbir iştirakçıları Mərkəzi Asiyada və bütövlükdə regionda hərbi-siyasi vəziyyəti müzakirə etmiş, beynəlxalq terrorizmin və din pərdəsi altında fəaliyyət göstərən cinayətkar qruplaşmaların ölkələrimizin suverenliyinə, ictimai-siyasi sabitliyinə ciddi təhlükə törətdiyini, onlara qarşı mübarizədə daha səmərəli iş birliyi yaradılmasının zəruriliyini vurğulamışlar.
Nazir Namiq Abbasov ölkəmizin Ermənistan Respublikası və Dağlıq Qarabağın separatçı rejimi tərəfindən genişmiqyaslı terrora məruz qaldığını, Azərbaycan xalqına qarşı aparılan məqsədli soyqırım siyasətinin ağır nəticələrini bir daha konfrans iştirakçılarının diqqətinə çatdırmışdır. Azərbaycan nümayəndə heyətinin başçısı döyüş əməliyyatları zonasından yüzlərlə kilometr aralıda dinc əhalinin kütləvi məhvinə yönəldilmiş terror aktları barədə konkret faktlarla ətraflı məlumat vermiş, etnik təmizləmə siyasətinin, terrorun Ermənistanda dövlət səviyyəsində dəstəkləndiyini və bunun istintaq və məhkəmə materialları əsasında tam sübuta yetirdiyini bildirmişdir.
Eyin zamanda, separatçıların beynəlxalq miqyasda təşkilatlanmalarına və məqsədlər birliyi zəminində iş birliyi qurmalarına səciyyəvi nümunə kimi göstərilmişdir ki, Ermənistan öz cinayətkar məqsədlərinə çatmaq üçün 1990-cı illərin əvvəllərində Dağıstanda və Azərbaycanın şimal bölgələrində separatçı “sadval” təşkilatı ilə əlaqə yaradaraq həmin təşkilatın 40 nəfərədək üzvünə Yerevan yaxınlığında və Dağıstan ərazisindəki xüsusi düşərgələrdə hərbi təlim keçmiş, onları silah və sursatla təmin etmişdir. Respublikamızın ərazisində onlarla insan tələfatı və böyük maddi ziyanla nəticələnən çoxsaylı partlayışlar törətmiş həmin terrorçuların əksəriyyəti məhz qonşu dövlətlərin, birinci növbədə Rusiya xüsusi xidmət orqanlarının yaxından köməyi ilə cinayət məsuliyyətinə cəlb edilmişlər.
Nazir Namiq Abbasov separatçılığın və bütövlükdə terrorçuluğun ayrı-ayrı dövlətlərin əlahiddə problemi olmadığını vurğulamış və bunun bütün ölkələr üçün ciddi təhlükə mənbəyinə çevrilməsi məsələsinə də toxunmuşdur.
Milli Təhlükəsizlik Naziri Namiq Abbasov Azərbaycanda da bir sıra cinayətkar dəstələrin din pərdəsi altında ölkədə sabitliyi pozmağa, qarşıdurma yaratmağa cəhd göstərdiklərini, lakin Respublikanın hüquq-mühafizə orqanları tərəfindən qətiyyətli tədbirlər görüldüyünü vurğulamış, narkobiznesə və transmilli cinayətkarlığın digər təzahürlərinə qarşı Azərbaycan dövlətinin apardığı mübarizə barədə məlumat vermişdir.
Konfransda müzakirə olunan məsələlər üzrə müvafiq qərarlar qəbul edilmiş, qarşılıqlı fəaliyyətin uzlaşdırılması məqsədi ilə əlaqələndirmə şurası yaradılmışdır. Görüş iştirakçıları konfransın işinin daha səmərəli və məqsədyönlü təşkili üçün TRASEKA, habelə Aktau-Bakı-Ceyhan layihələrinin təhlükəsizliyinin təmin olunmasında bu qurumun rolunun artırılması üçün göstərilən marşrutlar üzrə yerləşmiş qeyri-türk dövlətlərin, o cümlədən Rusiya və Gürcüstanın xüsusi xidmət orqanları nümayəndələrinin növbəti toplantılara dəvətini məqsədəuyğun saymışlar.
Türkdilli dövlətlərin xüsusi xidmət orqanlarının növbəti Konfransını gələn il Türkiyə Respubliikasında keçirmək qərara alınmışdır.
Bölmənin digər xəbərləri
